„Моето денешно патување заедно со мојот француски колега и во име на ЕУ е јасен сигнал за Сиријците: можен е нов политички почеток меѓу Европа и Сирија, меѓу Германија и Сирија“, рече Баербок, според соопштението објавено пред нејзиното заминување за Дамаск, пренесе Ројтерс.
Баербок и францускиот министер за надворешни работи Жан-Ноел Баро се првите врвни дипломати од Европската унија кои се во посета на Сирија откако бунтовниците ја презедоа контролата врз Дамаск на 8 декември, принудувајќи го претседателот Башар ал Асад да избега по повеќе од 13 години граѓанска војна и завршувањето на повеќедецениското владеење на неговото семејството.
„Во Сирија сакаме да промовираме мирна и комплексна транзиција во служба на Сиријците и регионалната стабилност“, напиша Баро на мрежата Икс.
Откако беше соборен Асад, исламистичките бунтовници предводени од групата Хајат Тахрир ал Шам (ХТС) се обидоа да ги убедат арапските земји и меѓународната заедница дека ќе владеат во име на сите Сиријци и дека нема да ја шират исламистичката револуција.
Западните влади почнаа постепено да отвораат канали за комуникација со ХТС, сунитска муслиманска група претходно поврзана со Ал Каеда, и почнуваат да размислуваат дали треба да ѝ се одземе ознаката како терористичка организација.
Баербок рече дека патува во Сирија со „подадена рака“, како и со „јасни очекувања“ од новата влада, која ќе биде оценета според нивните постапки. Знаеме од каде доаѓа ХТС идеолошки, што правеше во минатото, рече Баербок.
„Но, исто така слушаме и гледаме желба за умереност и разбирање со другите важни актери“, додаде таа, наведувајќи ги разговорите со курдските Сириски демократски сили (СДФ), сојузници на САД. Сега целта е Сирија повторно да стане ценет член на меѓународната заедница, додаде таа.
