Германија бележи зголемување на сомнителните случаи на шпионирање поврзани со Русија по инвазијата на Украина, а исто така и со Кина.
Германската министерка за внатрешни работи Ненси Фезер објасни дека заканата за демократијата од шпионажа и саботажа добила „нова димензија“, пишува Дојче веле.
„Руската агресија во Европа фундаментално ја промени безбедносната ситуација. Германија исто така е во фокусот на разузнавачките служби на други земји“, предупреди Фезер.
„Со цел да ги намалиме безбедносните ризици, ќе мора да бидеме уште повнимателни за тоа на кого ќе му довериме важни задачи и доверливи информации во безбедносно релевантните области на државата и нашата критична инфраструктура“, додаде таа.
Предлог-законот воведува проширени задолжителни мерки за проверка на персоналот на работните места кои се критични за безбедноста, како што се ИТ и комуникациите.
Поточно, ова се однесува на критичната инфраструктура како што се железниците и контролните центри за снабдување со електрична енергија, како и највисоките нивоа на федералната влада.
Тука спаѓаат министерствата, канцеларијата на федералниот претседател. Ќе се проверува дали кандидатите имале проблематични коментари и изјави на интернет и социјалните мрежи.
„Нема да дозволиме екстремисти да ја саботираат нашата демократска уставна држава одвнатре“, рече Фезер. Владата вчера го одобри законот, а сега мора да биде одобрен и од пратениците пред новите мерки да станат закон.
Неколку случаи на наводно шпионирање за Москва ја потресоа Германија од руската инвазија на Украина во 2022 година.
Во еден случај, поранешен германски разузнавач беше обвинет дека ѝ дал информации на Русија кои покажуваат дека Берлин имал пристап до детали за платенички операции на Москва во Украина.
Кинеската шпионажа исто така предизвикува сè поголема загриженост. Во април, во најпознатиот таков случај, беше уапсен помошник-пратеник во Европскиот парламент од германската екстремно десничарска партија Алтернатива за Германија (АфД) под сомнение дека шпионирал за Пекинг.
