Една година од трагедијата: Кочани во солзи за 63-те млади животи од Пулс

Една година по пожарот во дискотеката „Пулс“, во Кочани денеска се одржа комеморација во спомен на 63-те загинати. Во Паркот на револуцијата беа поставени 63 бели столчиња, симболично потсетување на младите животи што згаснаа таа ноќ, а на нив беа оставени бели ружи. На одбележувањето присуствуваа семејствата на жртвите, граѓани и државни претставници, меѓу кои и премиерот Христијан Мицкоски и претседателката Гордана Силјановска-Давкова. Со фотографии во рацете и значки со натпис „Кочани 16.3.2025“, присутните во тишина им оддадоа почит на загинатите.