Трамп, кој им се закани и на Канада, Мексико и Кина со високи царини, изјави вчера дека Европа има проблематичен трговски суфицит со Соединетите Американски Држави и дека е „на мета на царините“.
Во изјавите за медиумите пред работниот ручек во Елисејската палата, Макрон и Шолц инсистираа Европа е силна, а француско-германскиот тандем цврст, иако очекуваат тешкотии, пренесува Ројтерс.
„Претседателот Трамп, тоа веќе е јасно, ќе биде предизвик“, кажа Шолц.
„Нашиот став е јасен. Европа е големо економско подрачје со околу 450 милиони граѓани. Ние сме силни. Ние стоиме заедно. Европа нема да се повлече и скрие“.
Макрон веќе подолго време ја заговара идејата Европа да биде посамостојна.
„По инаугурацијата на новата администрација во Соединетите Американски Држави, попотребно од кога било е Европејците, а особено нашите две земји, да ја играат својата улога во јакнењето на единствена, силна и суверена Европа“, кажа тој.
Двајцата лидери ги спомнаа секторите на челикот, автомобилската индустрија и хемијата – потенцијалните мети на американските царини – како клучни за европската економија.
