„Ние сме денеска рането општество, довербата во институциите е сериозно нарушена. Ако сакаме да ја вратиме, мора да спроведеме целосна, транспарентна и објективна истрага. Никој не смее да биде поштеден – ниту актуелни, ниту поранешни функционери или службеници. Ова не е прашање на политика, туку прашање на вистина и правда“, порача Филипче.
Тој апелираше до истражните органи и обвинителството редовно да ја информираат јавноста за текот на истрагата.
„Не смее да остане ниту најмала сенка на сомнеж. Ако постои дури и најмала индиција дека некој се штити, тоа ќе биде удар врз целото општество. Обвинителството мора да информира редовно – ако треба и двапати на ден – за секој чекор во истрагата. Граѓаните имаат право да знаат“, истакна Филипче.
Тој нагласи дека одговорност мора да има за секого, без исклучок.
„Потребна е одговорност од секој еден. Ова не е време за политички пресметки, туку за единство. Треба да покажеме човечност и солидарност. Ветувам дека нема да дозволам политизирање на овој процес, исто како што нема да дозволиме некој да биде поштеден. Како опозиција, будно и интензивно ќе го следиме процесот за да обезбедиме дека правдата ќе биде задоволена“, заклучи Филипче.
СДСМ останува посветена на транспарентноста, вистината и одговорноста за сите инволвирани во овој трагичен настан.
Во тој контекст, претседателот на СДСМ, Венко Филипче, порача дека партијата останува посветена на откривање на вистината и обезбедување правда по трагичниот настан што ја потресе земјата.
„Ние сме одговорна и државотворна партија. Ќе излеземе во пресрет на сите иницијативи што водат кон идентификување на причините. Истовремено, како партија го нудиме целиот наш капацитет – човечки и интелектуален – за да помогнеме во овој процес“, истакна Филипче.
Тој нагласи дека ова е момент кога општеството мора да биде сплотено и дека секој акт на морална одговорност ќе биде поздравен.
„Сега не е време за поделби. Треба да покажеме верба во принципите, во правдата и во институциите. Секој што носи одговорност мора да се соочи со последиците, а секој чин на морална одговорност е добредојден“, рече Филипче.
Дополнително, тој апелираше до безбедносните служби внимателно да ги следат состојбите и да спречат евентуални обиди за продлабочување на кризата.
„Нашето мултикултурно и мултиетничко општество не смее да биде жртва на несигурност и тензии. Институциите мора будно да следат и да спречат секоја можна дестабилизација“, предупреди Филипче.
Во заклучок, тој истакна дека трагедиите можат да уништат, но и да зајакнат едно општество.
„Од нас зависи како ќе излеземе од оваа трагедија – како држава што научила лекција и донела правда, или како општество што дозволило ова да се заборави. Вечна им слава на починатите. Македонскиот народ нема да ја заборави оваа трагедија, а наша обврска е да осигураме дека никогаш повеќе нема да се повтори“, заврши Филипче.
СДСМ останува доследна на својата одговорност и поддршка во оваа тешка ситуација.
