„Бидејќи неточните информации пласирани во јавноста имаат цел да го моделираат јавното мислење и однапред да креираат атмосфера на линч, уште пред да стигне пријавата во ЈО, се чувствувам обврзан да ја презентирам вистината и целиот случај да го објаснам до детал.
Формално правно не постои никакво прекршување на законот на Кривичниот законик, Законот за хартии од вредност и правилници и акти донесени од Комисијата за хартии од вредност и Македонската берза.
Сакам јасно да кажам дека нема апсолутно никаков основ за злоупотреба на внатрешни информации која се однесува со висината на дивидендата за 2023 година, бидејќи моето стекнување на 500 акции е речиси еден месец подоцна, откога висината на дивидендата за 2023 година е јавно објавена за целата јавност СЕИ Нет, Систем за електронски информации за котирани акционерски друштва на Македонска берза за хартии од вредност.
Имено, висината на дивидендата е јавно објавена на СЕИ Нет на 30 јануари 2024 во Програмата за мерки и активности на деловната политика и Финансиски план за 2024 година на банката , додека моето стекнување на акции е на крајот од месец февруари 2024 година. Дополнително и напротив тврдењата дека акциите се стекнати по пониска цена, сакам да истакнам дека моето лично купување и купување на лица од моето потесно семејство е по далеку повисоки цени од берзанските цени кои биле во периодот после објавувањето на висината на дивидендата која е објавена во Финансиски план за 2024 година на банката објавен на 30 јануари 2024 сè до моето стекнување на акции на крајот од февруари 2024. Во овој меѓупериод останати инвеститори и лица се стекнале и истргувале повеќе од 17.000 акции од банката кои се количини на акции далеку поголеми и цени далеку пониски од моето стекнување на 500 акции на крајот од месец февруари 2024.
Сакам да истакнам и дека моето лично стекување на акции и купување на лица од моето потесно семејство е извршено во редовно класично тргување по цени кои биле берзански и пазарни на денот на моето купување врз основа на побарувачката и понудата на редовниот пазар на Македонката берза.
Сакам и да потенцирам дека не е основано тврдењето дека имам прибавено некаква противправна имотна корист со купувањето на акциите оваа година, бидејќи акциите кои ги купувам лично и акциите кои ги купува моето потесно семејство се купуваат континуирано и сукцесивно во изминатите 5-6 годни , истите акции се купуваат стратешки и долгорочно и немам извршено никаква продажба на акции за да имам прибавено некаква противправна имотна корист за мене или за моето семејство.
Сакам јавноста да знае дека висината на дивидендата која е објавена во Финансискиот план за 2024 година на банката објавен на 30 јануари 2024 , согласно Законот за трговски друштва требала да биде биде усвоена и е надлежност и предмет на финално одлучување и распределба од страна на Собранието на акционери одржано после два месеци од моето стекнување со акции.
На крај сакам да истакнам дека јас и мојата компанија имаме традиција на успешно работење во градежништво која во своето дваесетгодишно работно искуство има успешно инвестирано, проектиранo и изведено бројни проекти од областа на архитектурата и градежништвото и целиот капитал го инвестиравме во земјата кои врз основа на тие активности се плаќаат огромен износ на јавни давачки и даноци кон државата а дополнително сме и во улога како една од најголемите општествено одговорни компании кои реализираа повеќе хуманитарни проекти и донации.
Без разлика на обидот некој однапред да изврши притисок врз органите на прогонот и да креира атмосфера на линч, со изнесување на невистинити информации за да ми се наштети на мојата репутација интегритет и кредибилитет на мене лично и на моето семејство верувам дека институциите ќе бидат на ниво на задачата, нема да подлегнат на притисоците и ќе одлучуваат исклучиво врз база на законите и прописите во земјата“, се вели во реакцијата на Етеми.
Вчера МВР соопшти дека е поднесена кривична пријава против Ф.Е. од Скопје, поради основано сомнение за сторено кривично дело измама при работењето со хартии од вредност и удели по чл. 275 ст. 3 од Кривичниот законик.
