„Очекуваме позитивен дијалог со новата американска администрација врз база на нашите заеднички вредности и интереси. Во грубиот свет Европа и Соединетите Држави посилни се заедно“, порачаа Фон дер Лаен и Коста во координираната изјава објавена на социјалните мрежи.
Водачите на институциите на ЕУ првпат се огласија по низата потези на избраниот американски претседател Доналд Трамп, кои предизвикаа вознемиреност низ целиот континент. Трамп во минатите денови изјави дека ја сака Канада како 51-ва американска држава, потоа дека го сака Гренланд, островот во состав на Данска кој има голема автономија, како и контрола врз Панамскиот канал. Освен тоа, блискиот соработник на Трамп, најбогатиот човек на светот Илон Маск не престанува да се меша во политичките процеси во европските земји. Веќе со недели на социјалната мрежа Икс ја напаѓа британската влада на премиерот Кир Стармер и ѝ дава отворена поддршка на германската крајно десничарска Алтернатива за Германија наспроти предвремените избори на 23 февруари.
Коста и Фон дер Лаен наведуваат дека Соединетите Држави се еден од најблиските европски партнери и дека ЕУ е верна на јакнењето на трансатлантските врски, но и дека секогаш ќе ги штити своите граѓани, интегритетот на своите демократии и слободата.
„За ЕУ е битно да се заштитат и зајакнат нашите темелни демократски вредности, да се направи нашето стопанство поконкурентно и поодржливо, да се прошири нашата глобална мрежа на партнерствата и повеќе да се вложува во нашата безбедност. ЕУ секогаш ќе ги штити нашите граѓани и интегритетот на нашите демократии и слободи“, наведуваат Фон дер Лаен и Коста.
