Калас рече дека сега сите мисли се со жртвите на режимот на Асад и војната и со сите Сиријци, во Сирија и дијаспората, кои сега имаат можност да се обединат, да се стабилизираат и да ја обноват својата земја, повторно да ја воспостават правдата и да обезбедат одговорност.
Во овој критичен период, ЕУ е со сирискиот народ и е во близок контакт со партнерите во регионот и клучните меѓународни партнери, рече Калас.
„Сега, повеќе од кога било, императив е сите страни да се вклучат во инклузивен дијалог предводен и контролиран од Сирија за сите клучни прашања за да се обезбеди мирна и инклузивна транзиција, во духот на Резолуцијата 2254 на Советот за безбедност на ОН и во согласност со волјата на сирискиот народ“, рече Калас.
Таа додаде дека ЕУ силно, со сите средства што ѝ се на располагање, го поддржува ангажманот на специјалниот пратеник на ОН за Сирија, Геир Педерсен.
Таа ги повика сите актери во Сирија да избегнуваат натамошно насилство, да обезбедат заштита на цивилите и да го почитуваат меѓународното право, вклучително и хуманитарното право.
Таа конкретно апелираше за заштита на сите малцинства, вклучувајќи ги христијаните и другите малцински верски заедници, да се гарантира безбедноста на странските државјани и да се почитуваат дипломатските претставништва во Дамаск и да се заштитат богатото културно наследство и верските споменици на Сирија.
