недела, 14 април 2024

Ердоган: Праведен свет е можен, но не со Америка

Турскиот претседател Реџеп Таип Ердоган остро го критикуваше американското вето на резолуцијата на ОН за прекин на огнот во Појасот Газа и рече дека Советот за безбедност на ОН станал „совет за заштита на Израел“ и треба да се реформира.

Објавено на

часот

Сподели

„Од 7 октомври, Советот за безбедност е Совет за заштита и одбрана на Израел“, рече Ердоган по повод 75-годишнината од Декларацијата за човекови права.

Тринаесет земји гласаа за резолуцијата на Советот за безбедност во петокот, при што Обединетото Кралство беше воздржано, а Соединетите Држави ставија вето на текстот со кој се повикува на „итен хуманитарен прекин на огнот“ во Газа, и покрај притисокот од генералниот секретар на ОН кој го осуди „колективното казнување“ на палестинскиот народ.

„За жал, прекинот на огнот беше отфрлен… само Америка гласаше против. Дали е тоа правда“, праша Ердоган на собирот за човекови права во Истанбул.

Ердоган ги обвини и Вашингтон и Советот за безбедност на ОН дека застанале на страната на Израел и покрај влошувањето на хуманитарните услови во Газа. „Праведен свет е можен, но не со Америка“, обвини турскиот претседател. „Човештвото не може да напредува со ваков вид Обединети нации, со ваков Совет за безбедност“, рече тој. „Советот за безбедност мора да се реформира“, додаде тој.

Турскиот министер за надворешни работи Хакан Фидан во интервју емитувано по седницата на Советот за безбедност на ОН изјави дека Америка останува сама на својот став.

„Нашите пријатели повторно рекоа дека Америка сега остана сама, особено по денешното гласање во ОН“, рече Фидан во петокот во интервју за ТРТ.

Фидан ја даде изјавата по состанокот со колегите од Организацијата за исламска соработка и Арапската лига кои се сретнаа со американскиот државен секретар Антони Блинкен во Вашингтон. Турција, членката на НАТО, за разлика од своите западни сојузници и земјите од Персискиот Залив, не го смета палестинското исламистичко движење Хамас за терористичка организација.

Нацрт-резолуцијата беше подготвена откако генералниот секретар на ОН Антонио Гутереш во писмо до Советот за безбедност го активираше членот 99 од Повелбата на ОН, за прв пат откако ја презеде функцијата во 2017 година, што му овозможува на генералниот секретар да го сврти вниманието на Советот за безбедност на „секое прашање што, според него, може да го загрози одржувањето на меѓународниот мир и безбедност“.

ТОП ВЕСТИ

ПОСЛЕДНИ ВЕСТИ