Ердоган рече дека Денот на Европа не само што го симболизира почетокот на политичкото и економското единство на Европа, туку оддава и почит на кулминацијата на важните колективни напори за мир и стабилност во изминатите децении, јавува агенцијата Анадолија.
„Сепак, бројните предизвици како што се војните, терористичките напади, нерегуларната миграција и климатските промени, како на глобално ниво, така и во нашиот близок регион, го загрозуваат поредокот на европскиот континент“, рече Ердоган.
Тој додаде дека дискриминацијата и злосторствата од омраза против турската заедница во Европа стануваат се почести.
„Ескалацијата на исламофобијата, ксенофобијата и расизмот низ целиот континент се меѓу најголемите проблеми и за нашиот народ што живее во Европа и за имигрантите“, рече турскиот претседател.
Ердоган посочи дека политиката на одредени европски институции и држави за време на кризата во Газа ја поткопа довербата во европските вредности.
„Додека кризите, конфликтите и војните што ја погодуваат Европа и нашиот заеднички географски регион остануваат нерешени, преиспитувањето на овие вредности ќе продолжи да расте“, додаде тој.
Тој ја повика Европа да даде приоритет на инклузивни, кооперативни и правични политики.
„Би сакал да ја повторам нашата подготвеност да работиме заедно за попросперитетна, кохезивна и отворена Европа каде што нашата земја може да го заземе местото што ѝ припаѓа“, рече Ердоган.
