Имено, беше истакнато дека Хрватска во голема мера самостојно ќе го финансира овој пат и дека тој претставува дел од меѓународниот Јадранско-јонски автопатен коридор. Со други зборови, би требало да се надоврзе на она што ќе продолжи да се гради преку Црна Гора кон Албанија и уште подалеку кон Грција. Сепак, релативна конфузија може да предизвика фактот што со години се најавуваше дека делницата во правец на Дубровник всушност ќе се гради преку Босна и Херцеговина, веднаш до нејзината југоисточна граница со Хрватска.
Дали Хрватска еднострано одлучила за изградбата на своја територија? Дали Босна и Херцеговина е заинтересирана за оваа инфраструктура? И ако таа сообраќајница биде дел од Јадранско-јонскиот коридор, тогаш каде е местото на Пељешкиот мост и на пристапните патишта до него на истоимениот полуостров?, пишува Дојче веле.
Каде Брисел ја гледа Босна и Херцеговина?
Сите овие патишта се со две, а не со четири ленти, како што е случајот со автопатиштата. Исто така, не е сосема јасно каде се планира поврзувањето со Црна Гора на крајот на тој дел од коридорот низ Хрватска, со оглед на тоа што црногорските власти немаа намера да градат автопат толку блиску до морето, туку многу посеверно, од другата страна на планинскиот масив Орјен, над Херцег Нови, каде што Црна Гора всушност се граничи со Босна и Херцеговина.
Анонимен соговорник од Министерството за врски и транспорт на БиХ вели: „Ние секако остануваме присутни со врската Неум 1 и 2 на идниот Јадранско-јонски коридор, како и со Коридорот 5ц, чија рута се спушта низ БиХ од север до Плоча“. Европската Унија, сепак, со новата верзија на Регулативата на Европскиот парламент и Европскиот совет за насоките на ЕУ за развој на трансевропската транспортна мрежа го претстави Јадранско-јонскиот коридор покрај морето.“
Тој вели дека не е тајна дека во контактите и другите активности во врска со планирањето на изградбата на пат меѓу двете соседни земји често имало отпор од хрватската страна. Добар пример беа мостовите на реката Сава, чија изградба се одложуваше со години. А тука е и споменатиот Пељешки мост – него го плати ЕУ, т.е. најголем дел од неговата цена, пред сѐ затоа што Хрватска не успеваше да постигне договор со Босна и Херцеговина во врска со изградбата и пограничниот режим во Неум и Плоча.
Но, според Марко Шевровиќ, професор на Факултетот за транспорт и врски во Загреб, Пељешкиот мост сигурно нема да биде дел од автопатот, туку само пат паралелен со автопатот. „Ова е фазна конструкција и прашање е како ќе изгледа конечниот облик на коридорот. На тој дел од Хрватска секако му недостига алтернатива на Јадранската магистрала, а за таа траса е добро да не оди предалек од морето, за да има што поголема корист за локалното население“, вели експертот за патен сообраќај за ДВ.
„На Дубровник не му требаат нови автомобили“
„Не мора да размислуваме како на Дубровник да му недостигаат одреден број туристи што би дошле таму со автомобил, напротив. Но на локалното население му треба автопатот. Генерално, проблем во Хрватска е тоа што сообраќајните клучки се ретки, па подобро ќе беше за таа делница од автопатот наместо три да се проектираат барем пет. Знаете, нашиот просек е една клучка на речиси 20 километри автопат, а во Германија на четири или пет километри“, истакнува Шевровиќ. Неговото мислење е дека понатамошната судбина на Јадранско-јонскиот коридор очигледно останува неизвесна: од една страна, тоа е поврзано со процесот на пристапување на Црна Гора во Европската Унија, а од друга, важен е и сегашниот развој на поврзаноста меѓу централна Европа и нејзиниот југоисток, преку Бугарија и Романија.
Според сѐ досега, оваа приказна е далеку од завршена – иако Хрватска сеедно оди кон завршување на изградбата на автопатиштата на своја територија.
