Здружението за заштита на животни Анима мунди пред три дена објави фотографија на Дранго со мртва мечка, која ја придржува со кабел околу вратот, а тој е во ловџиска униформа и вооружен со снајперска пушка.
Дранго во изјава за медиуми тврдеше дека мечката е усмртена во сообраќајна несреќа на патот Битола – Ресен, кај Ротино, а тој како вработен во „Македонија пат“ учествувал во отстранувањето на животното од коловозот, по што се фотографирал, без да објасни зошто е во ловџиско одело и вооружен.
Од Анима мунди велат дека при усмртување на животно во сообраќајна несреќа треба да дојде МВР, екипа на Агенција за храна и ветерина… Вработените во „Македонија пат“ сигурно не одат во ловечка униформа, со пушка со дурбин за да отстрануваат мечки и сигурно не ги носат во планина за да се сликаат како да се ловен трофеј, вели Столе Велковски од Анима мунди.
Во Македонија според законот забранет е ловот на мечка, а за непочитување на законските одредби предвидена е парична, но и затворска казна до три години.
Од Основното јавно обвинителство во Битола соопштија дека веќе е оформен предмет по допрен глас, а настанот во целост ќе се проверува.
