И покрај постоењето на законска регулатива, значителните проблеми во имплементацијата создаваат ризик за корупција, велат од ДКСК.
„Ова е особено изразено во несоодветната примена на законските одредби, што води кон зголемен ризик од злоупотреба на средствата. Административните процедури, како што е пријавувањето на донации и трошоци од страна на политичките партии, се оценети како премногу комплексни и неефикасни, што доведува до зголемени административни трошоци и одложувања. Потребна е реформа на овие процеси за постигнување поголема ефикасност и намалување на можностите за корупција“, соопштија од ДКСК.
Исто така, Извештајот на ДКСК укажува на потребата од зајакнување на системите за мониторинг и надзор за обезбедување поголема транспарентност и отчетност во финансирањето на изборните кампањи.
Постои и низок степен на реализација на законската обврска за доставување на податоци за службените моторни возила со кои располагаат институциите, а тој е под 50 проценти. Исто така, констатирано е и отсуство на нормативно решение за санкционирање, со што се намалува можноста за превенција од злоупотреба на службените возила за потребите на изборната кампања.
Како што се укажува во Извештајот, од вкупните извори на финансирање на изборната кампања во износ од 459.815.831 денари, 77 отсто се пари од буџетот на државата, поради што ДКСК укажува на потребата истиот да се укине, поради постоење на корупциски ризици и идното влијание на политичките партии врз уредувачката политика на медиумите.
ДКСК истакнува дека Државната изборна комисија (ДИК) има исплатено 78 проценти од вкупната обврска за платено политичко рекламирање.
Во однос на постапувањето по предмети за последните избори, ДКСК информира дека оформила вкупно 65 предмети, кои се резултат на пријави за сомневање за сторени повреди на Изборниот законик и Законот за спречување на корупцијата и судирот на интереси, предмети оформени по сопствена иницијатива, по поднесени пријави, како и приговор поднесен од страна на една партија.
„Од вкупно донесените одлуки, 30 одлуки се за запирање, 15 одлуки за отфрлање на предметите, додека осум предмети се затворени со заклучоци поради идентична или слична содржина. По предметите за претседателските избори, покренавме шест иницијативи за поведување постапка за кривично гонење, како и четири иницијативи пред надлежните органи за поведување на постапка за утврдување на одговорност на службени лица“, се вели во извештајот на ДКСК.
Во однос на законската обврска за доставување на извештаи, од ДКСК констатирале дека значително мал број од партиите кои вршат платено политичко рекламирање имаат доставено извештаи до ДКСК, со што се нарушува принципот на транспарентност на изборната кампања и се намалува довербата во целокупниот изборен процес, за што не се изречени санкции од страна на надлежните институции.
„ДКСК значително придонесува за заштита на законитоста, објективноста и транспарентноста на изборниот процес преку ефикасно следење и контрола на финансирањето, превентивните активности и управувањето со пријавите за неправилности. Потребно е да се продолжи со унапредување на механизмите за справување со изборните нерегуларности и да се поттикне јавната свест и учество во откривањето на коруптивни активности, што е клучно за одржување на демократските процеси и доверба на граѓаните во институциите“, велат од Антикорупциска.
Државната комисија за спречување на корупцијата препорачува воведување нови механизми за следење на приходите и расходите, како и реорганизација на административните процеси за поефикасно управување со ресурсите и намалување на можностите за корупција.
