Како што соопштија од општина Куманово, овој стратешки проект е од големо значење за економскиот развој на регионот и претставува значајна странска инвестиција во Македонија.
Изградбата на комплексот се одвива според предвидената динамика и моментално е во фаза на заградување на магацинот. Логистичкиот центар на Лидл се простира на површина од 64. 000 квадратни метри во рамките на комплексот на површина од 170 хектари. Вредноста на инвестицијата е 80 милиони евра, а по завршувањето на проектот се очекува да се отворат нови 150 работни места кои значително ќе се одразат на локалната економија.
Лидл ја избра локацијата во Куманово поради поволната географска положба и одличната инфраструктура, што ќе овозможи брзо и ефикасно снабдување на идните продавници на Лидл во Македонија. Во изградбата на логистичкиот центар се користат најсовремени и најиновативни градежни стандарди, со посебен акцент на одржливоста. Центарот ќе биде опремен со фотоволтаични панели со вкупен капацитет од 1,7 мегават часови што ќе придонесе за зголемена енергетска ефикасност и намалување на јаглеродните емисии, се наведува во соопштението од Општина Куманово.
