Овој марш стана точка на триење меѓу полската радикална десница и конзервативците од една страна и владејачкиот либерален центар од друга страна. Минатогодишните избори му ставија крај на осумгодишното владеење на националистите.
Владата на Доналд Туск е на власт од декември, но поддршката за коалиционите партнери од левицата и центарот паѓа во анкетите поради внатрешниот конфликт околу клучните прашања во кампањата, како што е враќањето на правото на абортус, пишува Ројтерс.
Се чини дека ултрадесничарската Конфедерација, чии политичари се меѓу организаторите на настанот, доби поддршка од изборите и сега во анкетите има околу 12 отсто, што го одразува порастот на поддршката во делови од Европа поради противењето кон миграцијата.
Илјадници граѓани вчера вееја црвено-бели полски знамиња, додека некои извикуваа „Бела Европа на братски нации!“, „Стоп за Европската Унија!“ или носеа транспаренти со натписи „Белите земји за белите луѓе“, „Стоп за масовната миграција“, „Стоп за претворањето на Полска во Украина“.
„Се приклучуваме на овој марш… со една цел. Сакаме патриотскиот табор да биде обединет, сакаме патриотскиот табор да оди заедно во овој марш и во другите политички потфати“, рече Јарослав Качински, лидерот на националистичката партија Право и правда (ПиС), на прес-конференција пред да се приклучи на настанот.
„За Полска да биде суверена и нејзиниот народ да не биде подложен на левичарски експерименти што ги уништуваат општествените структури“.
За време на осумте години на власт, ПиС се обиде да воведе поконзервативни, традиционални семејни вредности во општествениот живот, вклучително и речиси целосна забрана на абортусот, и да стекне контрола над медиумите и судството.
Иако и националистичката партија ПиС и коалицијата на Туск силно ја поддржуваат Украина во војната против Русија, со поддршка од мнозинството Полјаци, некои се фрустрирани од приливот на бегалци.
Варшавските власти соопштија дека на маршот учествувале околу 90.000 луѓе, додека организаторите проценуваат дека имало околу 200.000 луѓе.
По повод 106-годишнината од независноста на Полска, Антифашистичката коалиција организираше марш наречен „За слобода, наша и ваша“.
