Тошковски посочи дека повредата на детето е од „метален фрагмент кој во моментов не може детално да се специфицира“.
„Има повеќе теории на случај за тоа како е повредено детето. Штом точно ги утврдиме причините за настанување на оваа тешка телесна повреда ќе ја информираме јавноста“, рече Тошковски.
Но, д-р Игор Мерџановски, директор на Клиниката за трауматологија, ортопедски болести, анестезија, реанимација и интензивно лекување и Ургентен центар (ТОАРИЛУЦ) денеска информираше дека детето е примено со тешка прострелна повреда на главата од огнено оружје и дека се бори за живот.
Во врска со убиениот турски државјанин, министерот Тошковски кажа дека во инцидентот е тешко повреден уште еден маж, и како убиениот, и тој бил повреден со остар нож.
„Имаме осомничено лице, во интерес на истрагата не би можел да откријам повеќе детали. Моментално лицето е во бегство. Станува збор за поголем број учесници во вчерашниот кривично-правен настан и според информациите што ги имам досега – сите се странски државјани“, рече Тошковски.
Министерот соопшти дека во текот на новогодишната ноќ седум лица се повредени од употреба на пиротехнички средства, а едно лице се самоповредило од употреба на огнено оружје (ловна пушка) на територија на СВР Битола.
“Во целокупниот период во текот на вчерашниот ден регистрирани се 31 кривично дело и 23 сообраќајни незгоди од коишто две со тешки телесни повреди. Приведени се вкупно 49 лица по разни основи, најмногу во врска со нелегална трговија со дрога и нарушен јавен ред и мир“, изјави Тошковски.
Безбедносната состојба на територијата на целата држава, рече тој, била стабилна, и за таа цел имало засилено присуство на полицијата на терен и биле преземени координирани насочени мерки за одржување на поволна безбедносна состојба.
Како што рече Тошковски, бројките покажуваат дека „огромното мнозинство граѓани се однесуваа одговорно и со тоа придонесоа за лична и заедничка безбедност“.
„Зголеменото присуство на полицајци на терен придонесе да имаме мал број на настани на нарушување на јавниот ред и мир, генерално. Им благодарам на сите граѓани кои празнуваа одговорно така како што апелиравме и придонесоа сите заедно да направивме новогодишната ноќ да помине мирно“, рече Тошковски и им се заблагодари на сите припадници на полицијата кои биле на работа во текот на ноќта.
