Во Прилеп, рано наутро на крстосницата на улиците „Пере Тошев“ и „Димче Антулески“, дошло до судир помеѓу автомобил мерцедес управуван од 22-годишник и електричен тротинет управуван од 41-годишен прилепчанец. Возачот на тротинетот се здобил со тешки повреди.
Во Скопје, на велосипедска патека кај автобуска постојка на улицата „11 Октомври“, електричен тротинет управуван од женско лице удрил во 59-годишна жена и го напуштил местото на несреќата. Повредената е пренесена во болница со тешки телесни повреди, додека полицијата трага по сторителот.
Уште една несреќа во главниот град се случила на крстосницата на улиците „Пекљане“ и „Антон Кецкаров“, каде автомобил фолксваген голф удрил во мопед. Возачот на мопедот се здобил со тешки повреди и бил пренесен во Ургентниот центар.
На регионалниот пат Кичево–Осломеј, пак, се судриле две патнички возила ауди и пежо. Двајцата возачи биле пренесени во болница, при што кај едниот се констатирани тешки телесни повреди. Алкотестот покажал дека повредениот возач управувал со 1,71 промили алкохол во крвта, по што бил лишен од слобода, а неговото возило одземено.
Од полицијата информираат дека се извршени увиди на сите локации и се преземаат мерки за целосно расчистување на случаите.
