Веднаш по пријавување на случајот во Струга, полициски службеници од надлежното полициското одделение за безбедност на патниот сообраќај излегле на местото и затекнале повеќе од 500 лица и околу 120 спортски и луксузни возила, кои наводно изведувале изложба. Лицата не постапиле по наредбите на полициските службеници, по што биле ангажирани дополнителни служби и состојбата била ставена под контрола.
„Притоа, биле одземени пет возила по член 344 од Законот за безбедност на патниот сообраќај (ЗБСП), а биле констатирани и осум други прекршоци од ЗБСП. По целосно расчистување и документирање на настанот, ќе бидат поднесени соодветни поднесоци“, соопштија од МВР.
Во Скопје пак, полицијата поднела пријави против лицата кои дивееја со автомобил по скопските булевари, а видео од настанот беше објавено на социјалните мрежи.
Во врска со видео записот што беше споделен на социјалните мрежи, Министерството за внатрешни работи информираше дека веднаш се преземени мерки и активности и лицата се пронајдени, извршен е службен разговор и против нив ќе бидат поднесени соодветни поднесоци согласно Законот за безбедност на сообраќајот на патиштата и Законот за возила.
Против 20 годишниот возач С.З. (20) од Скопје ќе биде поднесена пријава поради превезување лице на надворешните делови од возилото, возење без возачка дозвола и за управување возило без регистарски таблилки. Пријава ќе биде поднесена и против 19 годишниот Р.Ѓ исто така од Скопје кој, како што се гледа на видеото стои на хаубата од возилото и му дал да управува возило на лице без возачка дозвола, но и презел дејствија со кои ја загрозил својата безбедност.
„СВР Скопје презема и дополнителни мерки и активности за целосно расчистување на случајот“, велат од МВР.
