Во текот на 2025 година, во Министерството за внатрешни работи се пријавени 25 случаи на пукање на свадби, семејни веселби и прослави на отворено.
Од преземените мерки, за еден случај поднесени се две кривични пријави против двајца сторители за „тешки дела против општата сигурност“ и „предизвикување општа опасност“. Дополнително, поднесени се и три прекршочни пријави по член 31 од Законот за прекршоци против јавниот ред и мир – „неовластено пукање од огнено оружје, употреба на пиротехнички средства или сличен експлозивен или лесно запалив материјал, или на сличен начин нарушување на мирот и безбедноста на граѓаните“.
МВР информира дека постапува по сите пријави – во 15 случаи не било утврдено пукање, а шест случаи сè уште се расчистуваат и документираат.
Но, ваквите прослави знаат да завршат трагично. Во 2017 година, на свадба во кумановско Липково, 19-годишно момче од Германија, со потекло од Србија, почина откако беше погодено со залутан куршум во градниот кош. Според МВР, околу 22:45 часот, 63-годишен гостин на прославата, со нелегално поседуван пиштол калибар 9 мм, испукал неколку куршуми, од кои еден го погодил младото момче. Иако веднаш било пренесено во болница во Куманово, им подлегнало на повредите.
Пукањето на веселби не само што е опасно и казниво, туку станува и предмет на фалење на социјалните мрежи, каде се објавуваат фотографии и видеа од вооружени гости. Често, залутаните куршуми завршуваат во дворови, куќи или автомобили, а среќата што нема повредени во некои случаи е единствената пречка да не се повтори трагедија.
На 31 јули 2025, кумановската полиција ги лиши од слобода С.М. (30) и С.М. (25), поради пукање на семејна веселба. При претрес во нивниот дом биле пронајдени и одземени два пиштоли, за кои се сомнева дека биле користени во настанот. И додека вакви примери има многу, надлежните апелираат дека без разлика на поводот, пукањето на прослави е сериозен ризик за животот и безбедноста на луѓето и мора да биде искоренето.
