„Лицето е примено со четири прострелни рани во пределот на левата подлактица и десно колено. Направени се сите иследувања од наша страна-рендген, компјутер. Лицето е вон животна опасност. Со возило на општа болница Куманово е пренесено на клиниките во Скопје“, изјави директорот Стошевски.
Во меѓувреме, од Ургентен центар при ТОАРИЛУЦ, потврдија дека кај нив е донесено повреденото лице при пукањето во центарот на Куманово. Дополнително ќе соопштат повеќе информации за повредениот.
МВР соопшти дека повредениот е З.Ш.(43) од село Слупчане, општина Липково и оти е пренесен во кумановската болница.
– Денеска во 13.54 часот во СВР Куманово е пријавено дека на крстосница од улицата „Димитрије Туцовиќ“ со ул. „11 Октомври“ во Куманово, две лица во движење од огнено оружје пукале во патничко возило „фолксваген голф“, управувано од З.Ш.(43) од с. Слупчане, општина Липково, кој се здобил со повреди и е пренесен во болницата во Куманово за укажување помош, се наведува во информацијата од МВР.
Полициски екипи се на терен и вршат увид, а блокирана е улицата „11 Октомври“ на која покрај зградата на локалната самоуправа, се сместени сите поважни институции – судот, полицијата, поштата.
