Според МВР, при претресот се пронајдени три парчиња оружје кои осомничениот ги поседува со дозвола и тоа, полуавтоматска ловна пушка, репетирачки карабин и полуавтоматски пиштол, како и 395 куршуми од различен калибар, 17 парчиња ловен патрон и еден ресивер поврзан на видеонадзор инсталиран во домот во кој бил извршен претресот.
„Пронајдените предмети се одземени поради сомнение за извршено кривично дело по член 288 од КЗ. Утврдено е дека лицето оружјето го поседувал со дозвола и истото привремено е одземено по што ќе следи постапка за одземање на дозволата за оружје. Џ. Ќ. е лишен од слобода, а се преземаат мерки за пронаоѓање на неговиот син А.Ќ. и за расчистување на случајот“, информираше МВР.
Неофицијално, станува збор за Абдула Ќалими, син на поранешниот градоначалник на Општина Долнени, Џемил Ќамили од ДУИ во чиј дом е извршен претресот и е пронајдено оружјето од кое било пукано.
Според Кривичниот законик, за предизвикување општа опасност казната е од шест месеци до пет години затвор, а за тој кој што неовластено изработува, држи, продава, набавува или врши размена со огнено оружје, муниција или експлозивни материи, казната е од три до десет години затвор.
