Вознемирувачка сцена се одиграла во основно училиште во Тетово, каде вчера околу 15:30 часот, лице агресивно и дрско се однесувало кон директорката на училиштето, упатувајќи навреди и удирајќи со раце по влезната врата. Настанот бил пријавен во полиција, а случајот се расчистува.
Насилство меѓу децата – ограбени на автобуски и пред училишта
Само неколку часа подоцна, на автобуска постојка во скопската општина Карпош, двајца малолетници со закани ограбиле малолетно дете, одземајќи му пари. Сличен случај е пријавен и во Кисела Вода, каде четири лица, заканувајќи се со остар предмет, ограбиле малолетник, при што едно од лицата и физички го нападнало.
Насилството се префрла и во близина на училиштата. Во центарот на Скопје, по недоразбирање, малолетна ученичка била физички нападната од своја соученичка, во непосредна близина на средно училиште. Црната низа продолжува и надвор од Скопје. Во Струмица, тројца малолетници физички нападнале свој соученик во основно училиште, а насилството продолжило и надвор од училишниот двор. Против нив е поднесено известување до Обвинителството за насилство врз дете.
Дрогата меѓу младите е новото нормално
Полицијата регистрира и случаи со дрога меѓу младите. Во Скопје, на повеќе локации, лишени од слобода се 24-годишно лице и 17-годишник, кај кои била пронајдена марихуана.
Криминалот меѓу младите добива сѐ поопасни размери. Надлежните најавуваат истраги и конкретни мерки пред насилството целосно да стане секојдневна норма.
