Како што неофицијално е потврдено од владата, со амандманите е предвидено индивидуализирање на вината за злосторството во Сребреница, но и инсистирање на стриктно почитување на Дејтонскиот договор.
Во првиот амандман се наведува дека „вината за злосторството на геноцид е индивидуализирана, и не може да се припише на која било етничка, верска или друга група или заедница во целина“, а во вториот: „потврдувајќи ја неповредливоста на општиот рамковен договор за мир во Босна и Херцеговина во сите негови одредби“.
Со тие амандмани, како што смета црногорската влада, се спречува секое потенцијално манипулирање на штета на Србија и српскиот народ во смисла на какви било правни и политички последици и оневозможува наратив или намера еден народ да се прогласи за геноциден.
Со вториот амандман суштински дополнително се афирмира постоењето на Република Српска во рамки н БиХ, што е гарантирано со Дејтонскиот договор, имајќи предвид дека од одделни бошњачки функционери можеа да се слушнат изјави насочени против РС, наведува РТЦГ.
