„Очекувам Северна Македонија да ги почитува договорите и ќе ги потсетам европските колеги какви обврски беа преземени уште на 18 јули 2022 година кога беше усвоена Преговарачката рамка и какви се Патоказите за прием на земјата во ЕУ“, рече Главчев при пристигнувањето на денешниот прв ден од Самитот на ЕУ во Брисел.
„Во декември 2023 година тоа беше малку поконкретизирано и фокус беше ставен на уставните измени. Во последно време слушаме изјави од партиски лидери, но и од владини раководители во Република Северна Македонија дека нема да се извршат такви измени“, рече Главчев.
Тој нагласи дека ќе ги информира европските лидери какви се состојбите и што досега беше усвоено во однос на ова прашање.
„За мене е важно да покажам каква е бугарската позиција, која впрочем е и европска позиција“, изјави Главчев, додавајќи дека засега има намера само да ги потсети европските колеги што се случува, бидејќи за Бугарија тоа е важна тема.
