Официјална Софија реагира на информациите од Македонија во врска со железничкото поврзување, дел од Трансевропскиот коридор 8. „Бугарија успешно лобираше за обезбедување европски фондови, вклучително и за Република Северна Македонија. Благодарение на бугарските напори, Коридорот 8 беше вклучен во опсегот на европскиот транспортен коридор Западен Балкан – Источен Медитеран како приоритет за ЕУ. На крајот на 2023 година, делницата Крива Паланка – Деве Баир беше назначена од ЕУ како еден од шесте водечки проекти од стратегијата ‘Глобална порта’ и финансирана со над 500 милиони евра грантови и заеми. Модернизацијата и завршувањето на железничката компонента на Коридорот 8 на бугарска територија е дел од националната програма ‘Транспортно поврзување 2021 – 2027 година’“.
Бугарските медиуми потенцираат дека Коридорот 8 не е само врска помеѓу двете земји, туку и клучна логистичка маршрута во должина на јужното крило на НАТО од Јадранот до Црното Море и „одбивањето да се изградат основните компоненти на Коридорот 8 ја ослабуваат колективната безбедност на Алијансата“.
Мицкоски, пак, смета дека е неприфатливо за македонската Влада да се финансира проект кој завршува на пола тунел во слепа улица, и за тоа да се потрошат половина милијарда евра народни пари.
„Зошто половина милијарда евра? Затоа што вредноста на проектот е 560 милиони евра. Од тие 360 се кредит, а 200 милиони се грант. Станува збор во прва фаза 360 милиони евра пари на македонските даночни обврзници и 200 милиони евра пари на европските даночни обврзници. Во тендерската документација стои дека принципот на изработка на проектот е по жолт фидик. Тоа значи дека сумата, буџетот кој е определен е Буџет за реализација на овој проект и дека не се предвидуваат дополнителни пенали или дополнителни работи. Но тоа не е така, бидејќи во две страници во тендерската документација стои дека изведувачот има право на пенали и на дополнителни работи. Што значи дека е црвен фидик, а бидејќи е така многу лесно проектот може да дојде до 750, 800 милиони евра. Јас ова ви го кажувам како инженер. Не ви го кажувам како претседател на Владата“, истакна Мицкоски.
Тој подвлече дека Владата сака да го направи Коридорот 8, ама и да се заврши да не се создава од сè авантура. Нагласи и дека државата треба да се поддржува со бугарскиот сосед и дека не треба од сè да се прават политички теми.
„Тоа ќе подразбира минимум 500 милиони евра пари како кредит или од Буџетот, практично од граѓаните и 200 милиони евра пари на европските даночни обврзници, за 24 километра, 22 тунели коишто ќе завршат на пола тунел во слепа улица. Без да знаеме што ќе се случува од бугарска страна, бидејќи таму нема јасен проект. Дали тунелот ќе продолжи? Ние сега велиме дајте луѓе да го направиме ова како треба, да не потоа лечиме наместо да превенираме“, дециден е тој.
„Среќа што се случи промената па можеме сѐ уште да превенираме. Па велиме, дајте да го водиме проектот од бугарска страна. Нема таков. Дајте тој да го направиме. Зошто на пола тунел да завршуваме? Дајте да завршиме да биде навистина континуитет до Црното Море како што навистина предвидува стратешкиот Коридор и на НАТО Алијансата. Од Црното Море преку Бугарија, од кај нас, Албанија до Италија. Ајде да биде како што треба и мислам дека ќе наидеме на разбирање. Јас не правам политика од ова како што тоа го прават кај нашиот источен сосед. Жалам што за нивни внатрешно политички потреби тие прават политика од сето ова. Ова е инженерски проблем. Ова нема врска со политика. Сакаме да го направиме Коридорот 8, дај боже да го направиме Коридорот 8, прв сум за тоа да го направиме, но, да биде како што треба. Не можеме да влеземе, неодговорно е да влеземе во авантура во којашто не се знае дали ќе има крај или кога ќе биде крајот. Не сакаме да ни се случи новиот Кичево-Охрид автопат, само сега да биде во овие 24 километри. Жалам повторно ќе кажам нашиот источен сосед за сѐ прават тема политичка. Нема потреба, нема потреба. Тоа е исто како сега ние да кажеме граничниот премин во Берово е направен, поврзан е тој граничен премин со нов пат пропаѓа веќе години, години, затоа што од бугарска страна не се направени 20 километри и не е направен граничниот премин. На крајот на денот и не треба да се прават гранични премини. Ако мене ме прашате. Можам да кажам зошто ние го направивме експресниот пат село Жидилово од бугарска страна го нема, ама не сакам да влезам во таква игра кој е виновникот. Ние сме соседи, треба да се поддржуваме и не треба од сѐ да правиме политички теми“, изјави премиерот.
