Шокантниот потег на актуелниот комесар за внатрешен пазар, кој требаше да добие многу важна позиција во новата Комисија, доаѓа еден ден пред Фон дер Лаен да го претстави новиот тим на комесари во Европскиот парламент.
„Пред неколку дена, на самиот крај на преговорите за состав на новата Комисија, побаравте Франција да го повлече моето име од лични причини за кои никогаш лично не сте разговарале со мене. За ова, понудивте политичка трговија со наводно повлијателно портфолио за Франција во идната Комисија“, напиша Бретон во писмото до претседателката Фон дер Лаен што го објави на социјалната мрежа Икс.
„Сега ќе ви биде предложен друг кандидат, бидејќи поднесувам оставка од мојата функција во Комисијата, која веднаш стапува на сила“, напиша Бретон.
I would like to express my deepest gratitude to my colleagues in the College, Commission services, MEPs, Member States, and my team.
Together, we have worked tirelessly to advance an ambitious EU agenda.
It has been an honour & privilege to serve the common European interest🇪🇺 pic.twitter.com/wQ4eeHUnYu
— Thierry Breton (@ThierryBreton) September 16, 2024
Тоа е нов удар за претседателката Фон дер Лаен, која минатата недела мораше да го одложи претставувањето на својот нов тим комесари поради хаотичната ситуација околу смената на словенечкиот кандидат за комесар.
Фон дер Лаен, незадоволна од бројот на жени номинирани од земјите-членки за новата Комисија, изврши притисок врз помалите држави да ги заменат веќе предложените кандидати и наместо тоа да испратат кандидатки.
Словенечкиот кандидат за комесар Томаж Весел се повлече од трката, а владата во Љубљана ја предложи Марта Кос за нов кандидат.
Опозициската Словенечка демократска партија (СДС) на поранешниот премиер Јанез Јанша ја обвинува владата дека го принудила претходниот кандидат Томаж Весел да се повлече и потклекнала пред притисокот на Фон дер Лаен да номинира жена наместо маж за член на Комисијата.
Утре претпладне во Стразбур треба да се одржи состанок на конференцијата на претседателите на Европскиот парламент, тело кое ги собира претседателката на Парламентот и шефовите на пратеничките групи, на кои Фон дер Лаен треба да го претстави новиот тим на комесари и распределбата на ресорите во новата Комисија.
Сега сето тоа веројатно ќе биде доведено во прашање и се поверојатно е дека новата Комисија нема да може да биде потврдена во Европскиот парламент во наредните месеци за да ја преземе функцијата на 1 ноември.
