Руската Би-би-си, независната медиумска група Медијазон и доброволците броеле смртни случаи од февруари 2022 година. Според наодите, повеќе од 27.300 руски војници биле убиени во втората година од конфликтот, што покажува дека освојувањето на територијата имало висока цена во човечки животи. Русија одби да ги коментира наодите од извештајот.
Често кога се опишуваат руските освојувања се користи терминот „мелница за месо“ за да се опише безмилосното жртвување на воените сили за да се исцрпи украинската војска. Бројката од 50.000 е осум пати поголема од единствениот руски јавен официјален извештај за бројот на загинати, што го објави Москва во септември 2022 година.
Сепак, реалниот број на загинати Руси веројатно е многу поголем. Анализата на Би-би-си не го вклучува бројот на убиени припадници на милициите во регионите Доњецк и Луганск, окупирани од Русија. Доколку се додадат овие бројки, бројот на загинатите би бил уште поголем.
Што се однесува до украинските загуби, претседателот Володимир Зеленски во февруари оваа година рече дека 31.000 украински војници биле убиени – но проценките, врз основа на американските разузнавачки служби, укажуваат на поголеми загуби.
Руската војска претрпе нагло зголемување на жртвите во јануари 2023 година, кога започна офанзива во регионот на Доњецк. Институтот за проучување на војната (ИСВ) наведува дека Русите користеле неефикасни фронтални напади во форма на „човечки бранови“ за време на битката за градот Вухледар.
„Поради комплексноста на теренот, недостатокот на борбена моќ и неуспехот да се обидат да ги изненадат украинските сили, имаше мали придобивки и големи загуби“, вели ИСВ. Друг значаен скок на бројот на загинати се забележува во пролетта 2023 година, за време на битката кај Бахмут, кога платеничката група Вагнер помогна во заземањето на градот.
Водачот на Вагнер, Евгениј Пригожин тогаш процени дека изгубил 22.000 борци. Кога руските сили го започнаа својот поход на Авдијивка минатата есен, се бележи и нов пораст на бројот на загинати војници.
Волонтерите кои соработуваат со Би-би-си и Медијазон од почетокот на војната бројат нови воени гробови на 70 гробишта низ Русија. Сателитските снимки покажуваат дека властите значително ги прошириле областите каде што се наоѓаат гробиштата од почетокот на конфликтот. Би-би-си проценува дека најмалку двајца од петмина загинати руски борци немале врска со војската пред руската инвазија на Украина.
Имено, во 2022 година, на почетокот на конфликтот, Русија ги користела своите професионални трупи за извршување на комплицирани воени операции, но многу професионални војници набрзо биле ранети или убиени, а властите ги замениле со луѓе со помала обука или воено искуство – како доброволци, цивили и затвореници.
Затворениците беа клучни за успехот на „мелницата за месо“, а анализата на Би-би-си сугерира дека тие сега побрзо ги губат животите на линијата на фронтот. Москва му дозволи на Пригожин да регрутира во затворите од јуни 2022 година. Затворениците кои станаа борци се бореа во рамки на таа шема како дел од приватна војска во име на руската влада.
Вагнер имаше застрашувачка репутација за немилосрдни борбени тактики и брутална дисциплина. Војниците би биле егзекутирани на лице место доколку се повлечат од област без наредба. Вагнер продолжи да регрутира затвореници до февруари 2023 година, кога неговите односи со Москва почнаа да се влошуваат.
По смртта на Пригожин, руското Министерство за одбрана ја продолжи истата политика на регрутирање. Поранешните затвореници ја опишаа високата цена што ја платиле нивните пријатели.
„Пријателе мој, ако се пријавиш, биди подготвен да умреш“, напиша Сергеј на онлајн форумот за борците од Бура и нивните роднини, тврдејќи дека е поранешен затвореник кој се бори во единицата Бура од октомври. Друг член на форумот рече дека пред пет месеци се приклучил на единицата Бура од 100 војници, а сега останале само 38.
