Сиљановска Давкова рече дека не може за младите да се одлучува без младите и како што нагласи, многу логично е во процесот на одлучување, кога одредено прашање се однесува на младите, тие да кажат како го замислуваат решението. Таа додаде дека само одлуките во кои учествуваат младите имаат иднина.
Темата на настанот, одржан во Вила Билјана во Охрид по повод Меѓународниот ден на младите, во коорганизација на Националниот младински совет на Македонија кабинетот на претседателката, а со поддршка на британската Амбасада во Скопје, беа младинските перспективи и визиите на младите за лидер и лидерство.
Британскиот амбасадор Метју Лосон посочи на заложбите за поддршка на младите луѓе.
„Британската амбасада е одлучна во поддршката на младите луѓе низ целата земја. Нашата посветеност вклучува зајакнување на младите девојки и жени, како и препознавање на критичната улога што ја играат во градењето на инклузивни и отпорни заедници. Продолжуваме да работиме заедно со голем број партнери со цел да ги опремиме младите со неопходното знаење, вештини и искуства потребни за нивно напредување, како професионално, така и лично. На овој Меѓународен ден на младите, ми претставува огромно задоволство што ги славиме нашите достигнувања и нашите придонеси заедно со претседателката, партнерите и младинските организации. Ќе продолжиме да работиме заедно на овие важни прашања“, рече амбасадорот Лосон.
Претседателот на НМСМ, Филип Ивковски рече дека радува можноста за Меѓународниот ден на младите да им се овозможи на младите простор да разговараат за своите потреби и интереси со носители на одлуки.
„Се надеваме дека ова нема да биде ретка можност туку стандардна практика преку која младите секогаш ќе бидат дел од одлуките кои ги засегаат нив. Затоа и Националниот младински совет на Македонија веќе една деценија работи на креирање политики и мерки за млади издвојувајќи ги Законот за младинско учество и младински политики, Стратегијата за млади, Стратегијата за ментално здравје кај млади како позначајни системски решенија. Предизвиците се’ уште остануваат бројни, но секогаш нашата работа е водена од најдобриот интерес на секој млад човек и никој да не остане заборавен на маргините на општеството“, рече Ивковски.
Меѓународниот ден на младите кој се одбележува секоја година на 12 август е прогласен од Обединетите нации со идеја за подигање на свеста за младите и младинските прашања. Целта на денот е да се сврти вниманието на јавноста за одредени културни, социјални и правни прашања околу младите.
