„Не треба да биде големо изненадување ако Демократската партија што ги напуштила луѓето од работничката класа открие дека работничката класа ги напуштила нив. Прво тоа беше белата работничка класа, а сега тоа се латино и црните работници. Додека демократското раководство го брани статус квото, американскиот народ е лут и сака промена. И во право е“, рече Сандерс, кој вчера беше реизбран за четврти мандат во американскиот Конгрес како сенатор од Вермонт.
Сандерс, самопрогласен демократски социјалист, во Сенатот се собираше со демократите и водеше кампања за Камала Харис иако не се согласува со главните политики на демократите, како што се економските и социјалните политики, за кои верува дека треба да бидат социјално многу почувствителни и ориентирани кон работниците, а критичен е и кон американската поддршка за израелската политика на Блискиот Исток.
Тој ги повика демократите да извлечат поука од поразот на Камала Харис, како и од поразот на демократите во Сенатот, каде што Републиканската партија ја врати контролата, а сосема е можно истото да се случи и во Долниот дом.
„Денес, и покрај силното противење на мнозинството Американци, ние продолжуваме да трошиме милијарди за финансирање на агресивната војна на екстремистичката влада на Нетанјаху против палестинскиот народ, која доведе до ужасна хуманитарна катастрофа, смрт, масовна неухранетост и гладување на илјадници деца.
Дали големите интереси, добро платените консултанти и олигарсите што ја контролираат Демократската партија ќе извлечат каква било поука од оваа катастрофална кампања? Дали ќе ја разберат болката и политичкото отуѓување што ги доживуваат десетици милиони Американци? Имаат ли тие идеи како можеме да се справиме со сѐ помоќната олигархија, која има толку голема економска и политичка моќ? Веројатно не.
Во следните недели и месеци, оние меѓу нас што се загрижени за темелите на демократијата и економската правда мора да поведат многу сериозни политички дискусии“, рече Сандерс.
