Главната опозициска Националистичка партија на Бангладеш (БНП), која учествуваше на изборите во 2018 година, но остана настрана во 2014 година, ги бојкотираше изборите откако Хасина ги отфрли нејзините барања да поднесе оставка и да дозволи неутрална власт да ги спроведе изборите.
Американскиот Стејт департмент соопшти дека изборите во Бангладеш не биле слободни и фер, додавајќи дека Вашингтон е загрижен од извештаите за нерегуларности во гласањето и го осуди насилството.
Британското Министерство за надворешни работи исто така ги осуди, како што рече, „актите на заплашување и насилство“.
Хасина го минимизираше бојкотот на опозицијата и рече дека нејзина цел во следните пет години е зајакнување на економијата.
„Секоја политичка партија има право да одлучува, отсуството на една партија на изборите не значи дека нема демократија“, изјави таа за новинарите во својата официјална резиденција во главниот град Дака.
Ќерката на шеикот Муџибур Рахман, основачот на Бангладеш, кој беше убиен во воен удар во 1975 година, заедно со поголемиот дел од семејството, Хасина (76) првпат стана премиер во 1996 година. Ова ќе ѝ биде вкупно петти мандат.
Во нејзините последни 15 години на власт, таа е заслужна за пресврт во економијата и огромната конфекциска индустрија, истовремено освојувајќи меѓународна пофалба за обезбедување засолниште за муслиманите Рохинџа кои бегаат од прогонство во соседен Мјанмар.
Критичарите ја обвинуваат Хасина за авторитаризам, кршење на човековите права, задушување на слободата на говорот и потиснување на несогласувањето.
Економијата, исто така, нагло забави откако војната меѓу Русија и Украина ги зголеми цените на горивото и увозот на храна, принудувајќи го Бангладеш да се обрати до Меѓународниот монетарен фонд за помош од 4,7 милијарди долари минатата година. Инфлацијата во ноември изнесуваше 9,5 отсто.
„Владата мора да ја заузда лудата инфлација. И барам да ги намали даноците и да дава субвенции за сиромашните луѓе. Не сакаме ништо друго“, рече Абдул Халим, продавач на пластични играчки во Дака, додека читаше весник залепен на ѕидот.
Народот на Бангладеш главно не учествувал на изборите, кои беа обележани со насилство.
Излезноста беше околу 42 отсто кога беа затворени гласачките места, рече главниот изборен комесар Кази Хабибул Авал, во споредба со над 80 отсто на последните избори во 2018 година.
Владејачката партија Авами лига освои 222 места од вкупно 298, според неофицијалните резултати објавени од Изборната комисија.
Самата Хасина освои 249.962 гласа во својата изборна единица Гопалгањ, на околу 165 километри јужно од Дака, додека нејзината противкандидатка обезбеди само 469 гласа.
Неколку земји, меѓу кои Индија, Русија и Кина, упатија честитки до Хасина.
