Бајден одговараше на прашања на новинари на брифинг во Белата куќа.
„Израелците не одлучија што да прават во врска со нападот. За тоа сè уште се разговара“, изјави Бајден за новинарите.
„Да бев на нивно место, ќе размислев за алтернативи за гаѓање на нафтените постројки“, додаде тој.
Тензиите меѓу Иран и Израел се на високо ниво бидејќи Израел ги разгледува опциите како да одговори на нападот со балистички ракети на Техеран, кој Иран го изврши во вторникот како одговор на воената акција на Израел во Либан.
Бајден беше прашан и од новинарите дали мисли дека израелскиот премиер Бенјамин Нетанјаху се обидува да влијае на американските избори на 5 ноември со тоа што не сака да се вклучи во дипломатско решение на ситуацијата.
„Дали тој се обидува да влијае на изборите, не знам, не сметам на тоа“, одговори Бајден. „Ниту една администрација не му помогна на Израел повеќе од мојата“.
Американскиот претседател изјави и дека е уверен оти претстојните претседателски избори ќе бидат слободни и фер, но е загрижен за реакцијата на републиканскиот кандидат Доналд Трамп доколку загуби.
„Уверен сум дека тие ќе бидат слободни и фер. Не знам дали ќе бидат мирни. Она што го кажа Трамп и она што го кажа минатиот пат, кога не му се допадна исходот од изборите, е многу опасно“, рече Бајден.
Бајден рече дека е значајно што изборот на Трамп за потпретседател, американскиот сенатор Џеј Ди Венс, не сакал да потврди за време на потпретседателската дебата дека ќе го прифати исходот од изборите на 5 ноември.
Трамп се кандидира против демократската потпретседателка Камала Харис во тесна трка за која ќе одлучуваат гласачите во само неколку држави.
