„Денес во Америка се создава олигархија во форма на екстремно богатство, моќ и влијание, а тоа ја загрозува нашата демократија, нашите права и слободи“, рече Бајден, кој официјално ќе биде заменет од новоизбраниот претседател Доналд Трамп на 20 јануари.
Повикувајќи се на изјавата на Двајт Ајзенхауер за загрижувачкиот пораст на воено-индустрискиот комплекс, актуелниот претседател додаде дека е загрижен поради „подемот на технолошко-индустрискиот комплекс, кој исто така може да биде опасен за земјата“.
Бајден алармираше во време кога некои од најбогатите луѓе во Америка и сопствениците на технолошки гиганти се собраа околу Трамп, но тој не спомна никого по име.
Претседателот во заминување го започна своето последно обраќање до нацијата коментирајќи ја веста за договорот за прекин на огнот меѓу Израел и Хамас. Тој повтори дека „неговата администрација го постигнала договорот“ за кој тој зборуваше во мај годинава.
„Но тоа ќе биде спроведено од следната администрација, и затоа реков дека моите соработници треба да бидат во контакт со новата администрација“, рече Бајден, само неколку часа откако Трамп си ја припиша заслугата за договорот.
Демократот, кој беше сенатор, потпретседател и претседател на Соединетите Американски Држави во политичка кариера што се протега повеќе од 50 години, во своето последно официјално обраќање зборуваше и за тешкиот период кога дојде на власт за време на пандемијата на ковид, како и за економското закрепнување што следеше.
„Ќе биде потребно време да ги почувствуваме ефектите од сето она што го направивме, но семето е засадено и плодовите ќе се видат во наредните децении“, рече тој.
Бајден посочи дека за време на неговиот мандат бил донесен „најзначајниот закон за безбедност на оружјето во изминатите 30 години“, како и важни регулативи во областа на климатските промени, така што „веќе не треба да избираме помеѓу економскиот напредок и климатските промени“.
Но, како што наведе, не смее да се дозволи „заради профит да се укинуваат прописите што се важни за иднината“.
Тој предупреди на „опасноста од вештачката интелигенција“ доколку областа не биде регулирана. Тој, исто така, ги критикуваше социјалните мрежи за укинувањето на проверката на фактите, пренесува Гласот на Америка.
Бајден се осврна и на домашната политика и рече дека сите институции мора да бидат заштитени: од претседателството, преку Конгресот, судовите и слободните медиуми и дека институциите треба да се спротивстават на „неограничената моќ“ во наредните години.
Тој повика на промена на Уставот за укинување на неограничениот претседателски имунитет за дела извршени додека се на функција.
Врховниот суд во случајот со обвинението против Доналд Трамп за инвазијата на Капитол од страна на неговите поддржувачи на 6 јануари 2021 година одлучи дека тој има делумен имунитет од гонење.
На говорот во Овалната соба присуствуваа неговата сопруга Џил, синот Хантер и други членови на семејството, како и потпретседателката Камала Харис и нејзиниот сопруг Даг Емхоф.
Бајден рече дека му било чест да служи заедно со Камала Харис и додаде дека таа и нејзиниот сопруг станале „дел од семејството“.
Белата куќа објави извештај со детали за постигнувањата на администрацијата на Бајден-Харис дома и во странство.
Извештајот го истакнува историскиот економски напредок, кој создаде 16,6 милиони работни места, го зголеми БДП за 12,6 отсто и го зголеми просечното богатство на домаќинствата за 37 отсто. Беа нагласени инвестициите во инфраструктурата, чистата енергија и полупроводниците, како и Законот за намалување на инфлацијата.
На надворешнополитичкиот фронт, администрацијата инсистира дека остава „силни карти“ за администрацијата на Трамп што доаѓа.
„Ја оставаме Америка со повеќе пријатели и посилни сојузи, чии противници се послаби и под притисок. Америка што повторно води, ги обединува земјите и ја поставува агендата“, рече Бајден.
