Австралискиот премиер Ентони Албанезе, кој долго време се противеше на притворањето на основачот на Викиликс, во февруари го поддржа парламентарниот предлог со кој се повикува на враќање на Асанж, австралиски државјанин, во Австралија.
„Го разгледуваме барањето“, му рече Бајден на новинарот, кој праша дали има одговор на барањето на Австралија да прекине гонењето на Асанж.
Бери Полак, адвокатот на Асанж, коментарите на Бајден ги нарече охрабрувачки. Три недели претходно, Полак рече дека правниот тим на Асанж не видел никакви знаци за решавање на американските обвиненија против него.
„Охрабрувачки е што претседателот Бајден потврди дека Соединетите Држави размислуваат да се откажат од тужбата против Џулијан Асанж“, рече Полак во имејл.
Американското Министерство за правда не одговорило веднаш на барањето за коментар за изјавите на Бајден, според Ројтерс.
Екстрадицијата на Асанж во март беше ставена во мирување, откако Високиот суд во Лондон рече дека САД мора да дадат гаранции дека тој нема да се соочи со смртна казна.
Асанж (52) се бори против екстрадиција од Велика Британија во САД, каде што се бара по кривична пријава поврзана со објавувањето доверливи американски воени досиеја и дипломатски телеграми во 2010 година. Вашингтон вели дека објавувањето на документите загрозувало животи.
Поддржувачите на Асанж велат дека тој е херој против естаблишментот, кој станал жртва на разоткривањето на американските злосторства, вклучително и конфликтите во Авганистан и Ирак.
Ако биде екстрадиран, на Асанж му се заканува затворска казна до 175 години. Неколку групи за човекови права, водечки медиумски организации и водачи на земји како Мексико и Бразил, исто така, побараа да се отфрлат обвиненијата против Асанж.
