Американскиот претседател Џо Бајден рече дека ова е „многу добро попладне“ додека официјално го објавуваше договорот меѓу Израел и Хамас, набргу по привремениот договор за прекин на борбите во Газа и фазното ослободување на заложниците и палестинските затвореници, пренесува Си-ен-ен.
„Ова е многу добро попладне, бидејќи конечно можам да објавам дека е постигнат прекин на огнот и договор за заложниците меѓу Израел и Хамас, по повеќе од 15 месеци конфликт што започна со бруталниот масакр на Хезболах на 7 октомври“, рече Бајден, погрешно наведувајќи ја групата што го почна нападот на 7 октомври 2023 година.
„Повеќе од 15 месеци терор за заложниците, нивните семејства, израелскиот народ. Повеќе од 15 месеци страдање за невиниот народ во Газа. Борбите во Газа ќе престанат. А наскоро заложниците ќе се вратат кај своите семејства“, додаде тој.
Обраќањето на Бајден во Белата куќа, заедно со потпретседателката Камала Харис и државниот секретар Ентони Блинкен, беше емитувано додека катарскиот премиер потврдуваше дека е постигнат договор.
Бајден рече дека во текот на следните шест недели од првата фаза од прекинот на огнот, Израел ќе преговара за потребните аранжмани за втората фаза – „траен крај на војната“.
Американскиот претседател рече дека има „одреден број детали“ за кои треба да се преговара за да се премине од првата во втората фаза.
Доколку преговорите траат подолго од шест недели, прекинот на огнот ќе продолжи сѐ додека траат преговорите, додаде тој.
Втората фаза ќе овозможи размена за ослободување на сите преостанати живи заложници, вклучително и војници.
Исто така, втората фаза ќе вклучува повлекување на сите преостанати израелски сили од Газа и трансформација на привремениот прекин на огнот во траен, рече тој.
Бајден рече дека третата фаза од договорот за прекин на огнот ќе вклучува враќање на посмртните останки на заложниците што загинаа во Газа на нивните семејства, пишува Гардијан.
Големиот план за обнова на Газа ќе започне во оваа трета фаза, рече тој.
„Патот до овој договор не беше лесен. Ова се едни од најтешките преговори што некогаш сум ги доживеал“, посочи тој.
Постигнувањето договор тој го припиша на израелскиот притисок врз Хамас, со поддршка од САД, на смртта на лидерот на Хамас Јахја Синвар, на одговорот на коалицијата предводена од САД на нападите на Хутите, „значајното“ слабеење на Хезболах и на изборот на нов либански претседател.
„Сѐ на сѐ, овие настани во регионот, кои САД помогнаа да се обликуваат, ја менуваат работата“, додаде тој.
Бајден изрази „длабоко задоволство што дојде овој ден“ за народот на Израел и за невиниот народ во Газа.
„Палестинскиот народ помина низ пеколот. Премногу невини луѓе ги загубија своите животи. Премногу заедници се уништени. Според овој договор, народот во Газа конечно може да почне да се опоравува и обновува. Тие можат да гледаат кон иднината без Хамас на власт“, рече американскиот претседател.
Бајден беше запрашан колкава заслуга за прекинот на огнот во Газа има идната администрација на Трамп.
„Ова е буквално рамковниот договор што јас го предложив уште во мај. Буквално“, одговори тој.
Тој истакна дека американската поддршка за Израел помогнала да се ослабне Хамас и да се создадат услови за постигнување договор за прекин на огнот.
Додаде дека му рекол на својот тим да биде во „тесна координација“ со тимот на Трамп што доаѓа „за да можеме сите да зборуваме во еден глас, бидејќи така прават американските претседатели“.
Додека ја напушташе просторијата по конференцијата, еден новинар извика: „Кој е заслужен за ова, господине претседателе, Вие или Трамп?“
Бајден се сврте и одговори: „Се шегувате?“
