Русија со години изразува загриженост поради сè поголемиот пробив на НАТО, гледајќи ја таквата политика како егзистенцијална закана. Меѓутоа, во интервју за шпанската телевизија Унивисион, емитувано во вторникот, Бајден кажа дека неодамнешното пристапување на Финска и Шведска во редовите на воениот пакт е големо достигнување.
„Направивме нешто на што бев исклучително горд. Во НАТО сум ангажиран во текот на целата своја кариера. Успеавме да ја прошириме Алијансата, а имаме 3.000 километри граници бидејќи имате две нордиски нации кои се придружија на НАТО. Има цела низа земји на НАТО долж руската граница“, кажа американскиот претседател.
Бајден понатаму оцени дека блокадата во Конгресот на пакетот воена помош за Киев вреден 61 милијарда долари е „многу опасна“ за единството на блокот и го обвини поранешниот американски претседател Доналд Трамп дека практично ја држи таа мерка – како и целата републиканска партија – како заложници.
„Трамп ја предводи таа партија. Тој ја држи во еден вид смртен зафат. Последното што ни треба е да видиме дека НАТО се распаѓа. Тоа би била катастрофа за САД, катастрофа за Европа, катастрофа за светот“, кажа Бајден.
Вашингтон на Киев му испрати над 113 милијарди долари во различни форми на помош од почетокот на непријателствата со Русија.
Рускиот претседател Владимир Путин речиси две децении предупредува дека политиката на НАТО ја поткопува руската национална безбедност, но дека вистинската „црвена линија“ за Москва е обидот блокот да се префрли во Украина.
Конфликтот во Украина за Москва е „егзистенцијален“ и „прашање на живот и смрт“, кажа Путин во февруари, додека за Западот е само прашање на „подобрување на тактичките позиции“.
