Според американските медиуми, Тајната служба е во разговори со Џенерал моторс за развивање нова флота кросовери повторно заснована на шевролет сабурбан, но со значката и изгледот на кадилак ескалејд. Исто така, ГМ работи и на нова итерација на претседателската лимузина. Меѓутоа, како и секогаш кога станува збор за прилагодени, тешко блиндирани возила, ќе биде потребно време за да видиме какви било резултати од проектот.
Разговорите за новата флота кросовери се воделе на состанок во центарот за дизајн на ГМ во Мичиген. Објавени се фотографии од средбата на социјалните мрежи, а Драјв шпекулира дека може да се види прилагодена верзија на новиот изглед на кадилак ескалејд. Огромниот кросовер на хаубата има американско знаме и претседателскиот грб. Дополнителни преработки вклучуваат блиндирано стакло, засилени странични панели, и напредни технолошки системи во кабината.
Покрај проектот за кросоверите, Џенерал мотор работи и на поголем и покомплексен проект: наследник на лимузината на американскиот претседател, популарно позната како „ѕверот“. Според Ројтерс, ГМ го добила договорот вреден 14,8 милиони долари во септември 2024 од Одделот за домашна безбедност и Тајната служба за развој на нов модел. Вкупниот трошок би можел да изнесува до 40 милиони долари до завршувањето на возилата до 2029 година.
Актуелната верзија на лимузината на американскиот претседател датира од 2018 година, изгледа како кадилак седан поставен на шасија на голем пикап на ГМЦ. Се проценува дека тежи 9.100 килограми и е направена да издржи разни закани.
