Денешните возила се значително поголеми и потешки отколку пред неколку децении, а добар дел од таа дополнителна маса е диктиран од безбедносните прописи.
Сепак, многу е поголема веројатноста да преживеете фронтален судир во модерен автомобил отколку во еквивалентен модел произведен пред 20-30 години. Овој нов „креш“ тест на стар модел на Фолксваген е отрезнувачки потсетник за тоа колку далеку напреднала безбедноста на автомобилите, пишува Мотор1.
Декра, независна организација за безбедност на автомобили основана во Берлин во 1925 година, подложила голф од втората генерација на ригорозен современ тест за судир.
Целта била да се покаже колку далеку стигнала безбедноста на автомобилите споредувајќи го хечбекот од 1989 година со неговиот сегашен наследник, осмата генерација од 2024 година.
За овој необичен тест, германската организација за тестирање, инспекција и сертификација успеала да обезбеди автомобил стар 36 години во одлична техничка состојба.
Во својот центар за тестирање на судири во Нојминстер, Декра го лансирала голфот „двојка“ во бариера со 60 километри на час, симулирајќи ја постапката за фронтален судир која ја користел Еуроенкап до 2020 година.
Бариерата била опремена со деформациски елемент за симулирање на апсорпцијата на енергија од страна на возилата што доаѓаат од спротивната насока.
Под овие услови, тестот репродуцира челен судир помеѓу два идентични автомобили кои се движат со брзина од 50-55 км/ч.
Како да застрашувачките слики по судирот не се доволни, експерт на Декра ги сумирал резултатите:
„Во голф 2, патниците би имале мали шанси да го преживеат овој челен судир поради уривањето на патничкиот простор, длабокото продирање на компонентите на возилото во кабината, ненадејното успорување на телото и ударот во воланот.“
Исходот бил сосема поинаков за голф 8 тестиран под идентични услови, при што патниците веројатно се спасиле само со мали повреди:
„Целата патничка кабина остана целосно недопрена, а патниците беа многу добро заштитени од предните и страничните воздушни перничиња во комбинација со безбедносни појаси, затегнувачи и ограничувачи на силата на безбедносните појаси.“
Декра не сопрела на тестот за судир на голф од 1989 година. Тестовите на сопирање откриле дека на осмата генерација ѝ е потребно околу 30 отсто помалку време за целосно да застане.
Стабилноста во кривини била исто така тестирана во маневрирање, при што модерниот модел на Фолксваген безбедно го завршил тестот со 75 км/ч, додека неговиот претходник од 1989 година успеал да стигне само до 65 км/ч.
Разликите се растегнале и на други области. На пример, стандардните ЛЕД светла на новиот автомобил се покажале како неспоредливо подобри од халогените сијалици на неговиот претходник.
На задниот дел, ЛЕД стоп светлата ја подобриле видливоста за возачите зад нив, дополнително подобрени со трето стоп светло кое недостасува на моделот од 1989 година.
Треба да се напомене дека третото стоп светло не беше задолжително во Европа до крајот на деведесеттите години, иако некои автомобили го имаа и порано.
На крајот, иако едноставноста на стариот автомобил сигурно има свој шарм, не може да се негира дека голф „двојка“ денес повеќе личи на „смртоносна стапица“ во споредба со неговиот современ наследник.
