Унимог е синоним за разновидност и неуништливост со децении. Оваа работна машина на тркала поминува низ најтешките терени и ги воодушевува фановите низ целиот свет. Единственото нешто што никогаш не бил е луксузен. Но, се чини дека тоа сега се менува.
Сензационалниот изложбен примерок е создаден од Мерцедес спешл тракс во соработка со Хелгет енџениринг и Фарцојгбау, кои се сметаат за своевиден АМГ во светот на унимог. Токму тие, со официјален благослов на Мерцедес, ги исполнуваат желбите на клиентите за кои стандардниот унимог едноставно не е доволен.
Основната идеја на проектот е едноставна, но предизвикувачка: врз основа на моделот унимог У4023 да се создаде уникатно луксузно возило кое нема да изгуби ниту дел од своите легендарни теренски способности. Двојната кабина, масивните крила кои ги покриваат огромните теренски гуми на 20-инчните бандажи јасно покажуваат дека овој унимог и понатаму е сериозен.
Сепак, идејата за елегантен унимог не е сосема нова. Уште во 2005 година Брабус го претстави унимог У 500 блек едишн на Саемот за автомобили во Дубаи, покриен со црна боја и опремен со кожа, алкантара и навигација од С-класата.
Дваесет години подоцна, новиот изложбен автомобил ја поставува границата уште повисоко. На прв поглед, јасно е дека ова не е обична работна машина: мат сива боја, модерни ЛЕД светла, камери наместо надворешни ретровизори и светлосна лента на покривот се детали кои вообичаено не се гледаат на унимог.
Вистинското изненадување е скриено во ентериерот. Патниците се сместени во четири одделни седишта тапацирани со двобојна кожа со дијамантски шевови, што повеќе потсетува на С-класа отколку на теренец. Кожните детали на таванот и патосниците дополнително го нагласуваат луксузниот впечаток, а класичните ретровизори се заменети со таканаречениот мироркем систем со камери.
Значајни промени има и под хаубата. Серискиот четирицилиндричен мотор му го отстапи место на шестцилиндричен дизел (OM 936) со волумен од речиси осум литри. Развива 300 КС и испорачува неверојатни 1.400 њутнметри максимален вртежен момент. Во официјалното соопштение за медиумите скромно наведуваат: „Оваа модификација обезбедува повисоки перформанси, оптимизирано прилагодување на менувачот и зголемена удобност при возењето“.
Заклучокот е јасен: овој уникатен унимог е возило кое навистина никому не му е потребно, но кое зрачи со неверојатна привлечност. Иако во моментов е единствен примерок, ќе биде тестирано од среќен купувач во реални услови следната година (2026 година). Којзнае, можеби Мерцедес на крајот ќе се одлучи за мало сериско производство. Впрочем, автомобилите кои никому не му се потребни, а многумина ги сакаат, честопати се најдобрите.
