Шаленберг ќе ја преземе функцијата од канцеларот во заминување Карл Нехамер, кој најави оставка во текот на викендот, откако не успеаја неговите напори да формира коалиција без учество на Слободарската партија. Нехамер планира да се повлече во петок.
Кабинетот на претседателот Александар Ван дер Белен објави дека тој формално ќе му довери на Шаленберг „да ја води привремената влада“.
Тоа ќе биде втор пат Шаленберг да биде премиер на Австрија. Шаленберг беше канцелар помалку од два месеци на крајот на 2021 година, откако Себастијан Курц поднесе оставка и пред премиерската функција да му припадне на Нехамер, а тој се врати во Министерството за надворешни работи.
Антиимиграциската, евроскептичната и проруска Слободарска партија на Австрија победи на парламентарните избори во септември, но другите партии тогаш рекоа дека нема да соработуваат со неа на формирање влада.
Откако Нехамер ја објави својата оставка, неговата конзервативна Австриска народна партија направи остар пресврт од претходното одбивање дури и да размисли за соработка со Слободарската партија и нејзиниот лидер Херберт Кикл.
Кикл во понеделникот доби мандат да се обиде да ја формира првата влада предводена од екстремната десница по Втората светска војна. Тоа е процес кој може да потрае со недели или месеци и нема гаранции дека ќе успее. Шаленберг рече дека нема да остане во влада под Кикл.
