Насир Ахмад Тавхеди планирал напад во име на Исламската држава, според обвинението. Инаку, тој живеел во Оклахома со сопругата и едногодишното дете откако влегол во САД во 2021 година со специјална имигрантска виза.
Тој бил корисник на специјална програма за имигрантска виза, која ја примаат до 50 луѓе годишно, и е достапна за луѓе кои работеле со вооружените сили на САД или под раководство на шеф на мисијата како преведувачи или толкувачи во Ирак или Авганистан.
Во обвинението не е наведено дали Тавхеди работел како преведувач или толкувач во Авганистан. Според судските документи, американската федерална полиција со пристап до сметката на Гугл на Насир Ахмад Тавхеди забележала дека тој редовно ја консултира пропагандата на Исламската држава (ИД).
Тој бил во контакт преку пораки на Телеграм со лице идентификувано од федералната полиција како регрут на ИД. Со ова лице разговарал за своите планови да набави оружје и да го врати своето семејство во Авганистан.
Тој беше уапсен во понеделникот со наводен соучесник, малолетниот брат на својата сопруга, за време на таен состанок со федералните агенти со цел купување на јуришна пушка и муниција, соопштија американските правосудни власти.
„Министерството за правда го попречи планот на обвинетиот да набави полуавтоматско оружје за да изврши насилен напад во име на ИСИС на американско тло на денот на изборите“, рече министерот Мерик Гарланд преку соопштение.
Тој е обвинет за обид да обезбеди материјална поддршка на ИСИС и набавка на огнено оружје за да изврши федерално злосторство или тероризам, по две точки од обвинителството кои носат максимална казна од 20 години и 15 години затвор, соопшти Министерството за правда.
Милитантната организација Исламска држава уби и егзекутира илјадници луѓе во име на своето екстремно религиозно толкување пред да биде територијално поразена во Ирак во 2017 година и Сирија во 2019 година.
