Вилијамс (58) и Вилмор (61) во јуни заминаа на осумдневна мисија за тестирање на капсулата Боинг Старлајнер. Инженерите забележале проблеми со погонот и истекување на хелиум, а НАСА одлучи тие да останат на Меѓународната вселенска станица до февруари следната година. Осумдневен тест се претвори во осуммесечна мисија.
„Ова е мое среќно место“, рече Вилијамс за време на конференцијата, но призна дека ѝ недостигаат семејството и двете кучиња.
Тие рекоа дека не им било „удобно“ поради проблемите на Старлајнер, но им било тешко да го гледаат како ја напушта станицата и се враќа на земјата без нив. Но, Вилмор рече дека 90 отсто од нивната обука е „подготовка за неочекуваното“.
Тие им се заблагодарија на луѓето на Земјата што им испратија пораки и молитви. „Загриженоста за нас е многу трогателна“, рече Вилмор.
На прашањето дали се чувствуваат изневерени од НАСА, Вилмор одговори „апсолутно не“.
Тие на прес-конференцијата зборуваа за своите рутини. Вилмор станува во 4:30, а Вилијамс два часа подоцна. Рекоа дека уживаат во секојдневно вежбање кое е од суштинско значење за борба против губењето на коскената густина поради животот во вселената.
„Зглобовите не болат, што е прилично убаво“, додаде Вилмор. Најавија и дека ќе гласаат на претстојните претседателски избори.
