среда, 29 мај 2024

Арсоски: После пожарот треба нов елаборат за да продолжи градбата на Универзална сала

Во Универзалната сала изгоре елементот кој што требаше да биде дислоциран. Речиси 70 проценти е демонтиран материјалот кој беше во наша надлежност. Секоја штета која е направена на терен ќе ја сносат нашите компании, изјави денеска по брифингот со новинарите Лазар Арсоски од Универзал Балкан Скопје, фирмата изведувач што ја реконструира Универзалната сала.

Објавено на

часот

Сподели

„Речиси 70 проценти е демонтиран материјалот којшто беше во наша надлежност да го демонтираме и да го исфрлиме шутот. Во глобала во Универзална сала изгореа елементи коишто требаше да бидат дислоцирани од тој објект. Сѐ што беше вредно, сѐ што имаше некаква вредност за во музеј и за да може да се искористи уште во 2021 година беше извадено од салата. Во глобала, во салата беа старите материјали како иверица, стар челик, стар алуминиум“, рече Арсоски.

На новинарско прашање дали пожарот всушност им ја олеснил работата со оглед на тоа што изгоре елементот што требаше да биде дислоциран, тој рече дека сега ќе биде потешко бидејќи ќе треба да се направи и нов елаборат за тоа како да се извади стопениот челик, наместо да се демонтира како што било претходно предвидено.

Тој посочи дека двете компании кои ја реконструираат Универзалната сала – Актива Штип и Универзал Балкан ќе ја сносат штетата која е направена на терен. Осигурано е, како што подвлече, сѐ што е во објектот на Универзалната сала. Секоја штета ја поправа компанијата.

„Договорот е таков и од него нема бегање. Ќе се види која е направената штетата и нашите компании ќе ја сносат. Секоја штета што ја има на оваа челична конструкција ако биде увидена, ќе биде заменета со нова и сѐ тоа ќе се среди. Сѐ дури е во наше владение проектот ние тоа мораме да го направиме и ќе го направиме. И уште еднаш да објаснам, од овој пожар нема жртви и не е направена преголема штета на самиот проект. Доколку постои штета, ние ќе ја сносиме како последица. Професорите од Градежен факултет ќе кажат што е она што треба да се санира“, изјави Арсоски.

Љубин Макаровски, надзорен инженер од ЕОС Е.Е. денеска по брифингот изјави дека во Универзалната сала најпрвин треба да се направи испитување, вештачење и ќе мора да се испита новата постојна конструкција. Кога ќе се покаже дека коегзистенцијата на материјалот, на металот не е нарушена, тогаш ќе се продолжи со работа.

„Доколку металната конструкција е оштетена ќе биде заменета, а доколку само делови се оштетени, ќе бидат променети само тие делови. Запалениот дел требало секако да се реконструира, а за тоа до сега не се потрошени пари бидејќи истото требало да се случи во втора фаза“, рече Макаровски.

Тој напомена дека во Универзалната сала се работело во две фази, пожарот се случил кога требало да се работи во втората фаза.

Министерката за култура Бисера Костадиновска Стојчевска за време на брифингот посочи дека Универзалната сала ќе биде реконструирана и вратена на скопјаните. Упати апел до градоналачничката на Град Скопје, Данела Арсовска да ја признае важноста на Универзалната сала, посочувајќи дека им требало многу време да ја добијат документацијата за преземање на надлежностите.

ТОП ВЕСТИ

ПОСЛЕДНИ ВЕСТИ