петок, 14 јуни 2024
Испитите во целата држава денеска почнаа навреме

14.834 пријавени матуранти седнаа да полагаат мајчин јазик, апелот е да не се препишува

Испитите во целата држава денеска почнаа навреме. Задолжителниот предмет од државната матура, мајчин јазик го полагаат вкупно 14.834 пријавени матуранти. Учениците кои нема да го положат испитот во јуни, втората шанса ќе ја добијат во август, информираше директорката на Државен испитен центар, Билјана Михајловска

Фото: Пиксабеј

Објавено на

часот

Сподели

Во изјава за медиуми по почетокот на испитот во СУГС „Орце Николов“ во Скопје, Михајловска рече дека денеска се полагаат три мајчини јазици.

„Денеска во цела држава испитите почнаа на време, материјалите беа доставени навреме. Сите ученици се во своите училишта. Денеска полагаат 14834 пријавени матуранти. Тие го полагаат задолжителниот предмет, мајчиниот јазик, односно македонски јазик и литература, албански јазик и литература и турски јазик и литература“, рече таа.

Информираше дека сè се одвива во најдобар ред и рече оти очекува добри вести за крајот на полагањето, исто како и за резултатите на учениците.

Доколку некој од учениците ги прекрши правилата и препишува, како што дополни, неговиот испит ќе биде поништен.

„Оваа година, секој препишан текст кој што е идентичен со некој друг текст или делови се идентични, не само што ќе се бодува со 0 поени, туку ќе се поништи испитот. Секој ученик треба да го напише она што го знае, и за тоа да добие поени, ако препише ќе добие 0 поени и ќе му биде поништен испитот, рече Михајловска и  упати апел до учениците да не препишуваат и тестаторите да не дозволуваат препишување бидејќи, како што нагласи, не им прават добро на децата.

Во однос на повторната шанса за полагање, таа посочи дека секој ученик што не положил има право да полага во август, но има и еден исклучок.

„Има една мерка која што е во правилникот каде што не се дозволува полагање ниту во август. Тоа е мерка каде што се прекршени сериозно правилата од типот на вербален или физички напад на тестартори, или замена на идентитет, некој полага во името на некој друг, што не се случило за 15 години и сум убедена дека нема да се случи, во тој случај не може да дојдат во август, ќе дојдат следната година“, рече Михајловска.

За концептот на полагање во холови и спортски сали, таа рече дека е од превентивен карактер.

„ Целта  е да се добијат објективни резултати и да се спречи можноста во одредени групи и во одредени училници да не се почитуваат правилата како што можеби се случувало претходните години. Бидејќи сега веќе не е тоа еден мал затворен простор во кој што еден тестатор и 15 ученици може да ги прекршуваат правилата, сега сите се гледаат, сите се во иста позиција“, рече таа.

Митко Димовски, директор на СУГС „Орце Николов“ од Скопје, сподели дека во гимназијата денеска полагаат 276 ученици.

„Денеска тестирањето започна навреме, првото ѕвонче започна во 10 часот, потоа во 10:15 за почеток на тестирањето. Во нашата гимназија вкупно 276 ученици денеска го полагаат првиот дел од државната матура, мајчин јазик“, рече тој.

Според податоците на Државниот испитен центар (ДИЦ), организатор на полагањето на државната матура, за јунската сесија се пријавени 10 088 кандидати за испитот по македонски јазик и литература, 4189 за албански јазик и литература и 315 кандидати за турски јазик и литература.

Вториот (изборен) екстерен испит ќе се полага на 8 јуни. Пријавени се 1356 кандидати за математика, 13 198 за англиски јазик, 37 за француски јазик, 114 за германски јазик, 84 за естетика и по еден кандидат за руски јазик и за филозофија.

Според видот на образование, 6341 матуранти се од гимназии, 8230 од стручно и 263 од уметничко образование.

Испитниот материјал ќе им биде доставен на училиштата утрото во деновите кога ќе биде полагањето, а почетокот на тестирањето за двата испита ќе биде во 10 часот.

Полагањето ќе го надгледуваат околу 2000 тестатори – наставници кои се ангажирани во други, а не во своите училишта, како и околу 200 набљудувачи од ДИЦ, Бирото за развој на образованието, Министерството за образование и наука и од Центарот за стручно образование и обука.

Во голема просторија ќе има и повеќе тестатори на едно место така што оваа новина ќе овозможи подобра контрола на случувањата во текот на испитот и ќе оневозможи препишувања или масовно споделување на одговори, како што се случи минатата година во група на апликацијата Вибер на испитот по Англиски јазик.

Целта на новиот начин на реализирање на испитите е самостојно решавање на тестот и почитување на правилата за полагање кои постојат од воведувањето на државната матура во 2007 година (не е дозволено:  користење какви било дополнителни средства  – учебници, хартија, мобилни телефони и други електронски уреди,  консултација со другите матуранти, препишување, недолично однесување кон други лица во просторијата, пишување недолични знаци на тестот или текст кој го открива идентитетот и слично).

Матурантите кои во јунската сесија нема да ја положат државната матура или не во целост ќе може да се пријават за августовската сесија кога двата екстерни испита ќе се полагаат на 12 и 14 август 2024.

 

ТОП ВЕСТИ

ПОСЛЕДНИ ВЕСТИ