„Ќе носи правични и брзи дерегулациски одлуки на начин што ќе ја ослободи моќта на американските претпријатија, а во исто време ќе ги одржува највисоките еколошки стандарди, вклучително и најчистиот воздух и вода на планетата“, рече Трамп во објавата на неговата платформа за социјални медиуми Трут сошл.
Трамп веројатно ќе се обиде да поништи многу од правилата на ЕПА за согорување фосилни горива, вклучително и оние за ограничување на емисиите на јаглерод од електраните и за намалување на таквите емисии од возилата.
Трамп рече дека планира да почне да ги укинува правилата на ЕПА и на Министерството за транспорт за загадување на возилата на својот прв ден на функцијата и дека размислува за намалување или укинување на даночните привилегии за електрични возила и други стимулации.
Трамп, исто така, планира да ја укине можноста на Калифорнија да поставува сопствени правила за емисиите на возилата, како што тоа го стори во 2019 година.
Како кандидат за гувернер на Њујорк на изборите во 2022 година, Зелдин ја критикуваше одлуката на државата да се приклучи на калифорниската програма за возила со нулта-емисија, која ветува прекинување на продажбата на возила само на бензин до 2035 година.
„Ќе ја вратиме енергетската доминација на Америка, ќе ја ревитализираме нашата автомобилска индустрија за да ги вратиме американските работни места и ќе ги направиме САД глобален лидер во вештачката интелигенција“, рече Зелдин на Икс.
Зелдин ќе треба да биде одобрен од Сенатот, на кој на изборите овој месец му се врати републиканското мнозинство.
За време на неговиот престој во Конгресот од 2015 до 2023 година како претставник од Њујорк, Зелдин гласаше „за“ клучните делови од законот за животна средина во само 14 проценти од случаите, според резултатите од еколошката група Лига на еколошки гласачи.
Зелдин гласаше против значајниот Бајденов нацрт-закон за климатски промени, Законот за намалување на инфлацијата, кој не доби ниту еден глас од републиканците, и го отфрли законот што би го спречил зголемувањето на цените од нафтените компании.
