„Знам дека некои луѓе намерно не поднесоа оставка, или не им беше дозволено да поднесат оставка пред тој митинг (протестот во Нови Сад) за да не се каже дека тоа е направено под притисок на некој друг. Сега имате можност, покажете морална и политичка одговорност“, изјави Вучиќ за Радио-телевизијата на Србија во Баку.
Тој побара од обвинителите да продолжат да работат напорно за да се утврди кривичната одговорност, додавајќи дека знае колку е комплициран овој случај.
„Мораме да покажеме не само пиетет, не само грижа за семејствата на жртвите, туку и дека сме одговорно општество и дека ќе знаеме како кривично да ги казниме виновниците, а политичката и моралната одговорност мора да биде на повисоко ниво. Токму за да направиме разлика меѓу оние кои не се одговорни и оние кои мислат дека можат да добијат нешто со измама“, рече Вучиќ.
Зборувајќи за синоќешниот протест на опозицијата во Белград, тој рече дека правилно проценил дека нема да има проблеми и дека митингот ќе биде неуспешен.
„Добро проценив, затоа што направија многу катастрофални грешки. Не можете да го измамите народот, не можете секоја трагедија да ја користите за политички поени. Од друга страна, не можете да му кажете на народот дека Вучиќ не запалил свеќа, а потоа ние им покажавме слика каде запалив свеќа“, рече тој.
Тој ги повика оние кои размислуваат поинаку од властите да се сконцентрираат и да понудат планови и програми за Србија, наведувајќи дека изборите ќе бидат за две години, најмногу две години и три месеци.
Запрашан за реконструкцијата на Владата на Србија, тој рече дека тоа е работа на премиерот Милош Вучевиќ и на Српската напредна партија, но дека секако ќе го каже своето мислење доколку го прашаат.
„Мислам дека се потребни значителни промени и на тој план, некои се изморија, се навикнаа да бидат министри и тоа им стана рутина, а тоа не е добро. Мора да имате енергија. Ако после сите овие години немате крв, енергија и сила повеќе од мене, тогаш не сте за таа позиција. Ако дојдете на работа во 9.30 и си одите веќе во 11.30 затоа што имате попаметни работи, тогаш таа работа не е за вас“, изјави Вучиќ.
Тој додаде дека е апсолутно сигурен дека коалициските партнери ќе бидат преиспитани во задачата за реконструкција на Владата.
„Во однос кон некого имате десет скалила на скалата. Не ја губите довербата во некој однос одеднаш. Направете една грешка, трета, петта, довербата се намалува. Во одреден момент довербата нема повеќе скалила да се спушта. Тогаш е време работите да се менуваат“, рече Вучиќ.
