Најмалку четири лица загинаа, 23 се ранети во напад во областа Баста во Бејрут, пренесе телевизијата Хезболах ал Манар, повикувајќи се на информации од либанското Министерство за здравство.
Хезболах, проиранското движење во Либан, се смета за терористичка организација од Соединетите Американски Држави (САД), додека Европската унија (ЕУ) го стави на црната листа само неговото вооружено крило, но не и политичката партија претставена во либанскиот парламент.
Либанската Национална новинска агенција објави дека во нападот има жртви и дека е уништена осумкатница.
Снимката емитувана од либанската станица Ал Џадид покажува дека најмалку една зграда е уништена и неколку други тешко оштетени во близина.
Експлозиите го потресоа Бјерут околу 4 часот наутро, потврдија очевидци за Ројтерс. Безбедносни извори наведуваат дека во нападот биле фрлени најмалку четири бомби.
Ова е четврти израелски воздушен напад оваа недела, насочен кон центарот на Бејрут, иако повеќето израелски напади беа насочени кон јужните предградија контролирани од Хезболах.
Неколку функционери на Хезболах, најважниот сојузник на Техеран во регионот, беа убиени во воздушни напади врз јужните предградија на Бејрут.
Израел започна голема офанзива против Хезболах во септември, по речиси една година прекугранични непријателства предизвикани од војната во Газа.
Конфликтот започна кога Хезболах отвори оган во знак на солидарност со својот палестински сојузник Хамас, група на листата на САД и ЕУ како терористичка организација која го нападна јужен Израел на 7 октомври 2023 година.
Американскиот посредник Амос Хохштајн отпатува во Либан и Израел оваа недела во обид да обезбеди прекин на огнот.
