„Мислам дека Русите сакаат да видат крај на војната, навистина мислам. Мислам дека тие ги имаат картите бидејќи зазедоа многу територија. Тие ги држат картите“, изјави Трамп за Би-би-си додека се враќаше во Вашингтон по говорот на инвестицискиот состанок во Флорида, кој беше поддржан од Саудиска Арабија.
Американскиот претседател изјави за Би-би-си дека верува оти Москва сака да види крај на војната, што Русија ја започна пред речиси три години со целосна инвазија на Украина.
Трамп го нарече украинскиот претседател Володимир Зеленски „диктатор“ по втор пат во еден ден за време на говорот на Флорида. „Тој отфрла избори. Ниско е на украинските анкети. Како можеш да бидеш високо додека секој град се урива?“ рече Трамп.
Зеленски неговата изјава ја нарече „дезинформација“, обвинувајќи го дека живее „во простор на дезинформации што доаѓаат од Москва“. Неговиот петгодишен мандат требаше да истече во мај годинава, но изборите беа прекинати поради воената состојба која е на сила од февруари 2022 година.
Трамп тврдеше дека Зеленски има само 4 отсто поддршка во Украина, но Би-би-си објави дека анкетата спроведена овој месец покажа дека 57 отсто од Украинците имаат доверба во својот претседател.
Изјавите на Трамп предизвикаа критики од европските лидери, а германскиот канцелар Олаф Шолц рече дека „едноставно е погрешно и опасно да му се негира на претседателот Зеленски демократскиот легитимитет“.
Европските лидери предупредуваат дека не треба да се постигне договор без учество и согласност на Украинците, а бараат и ЕУ да има свое место на масата во мировните преговори. Во овој контекст, Трамп бара Европа да биде гарант за прекинот на огнот во Украина со испраќање свои војници во Украина.
Велика Британија и Франција не го отфрлија предлогот, но низ целиот континент постои резервираност кон таквата идеја. „Не можеме да испратиме војници без да постигнеме праведен мир“, рече германската министерка за надворешни работи Аналена Баербок.
Во меѓувреме, американските и руските официјални лица ги одржаа своите први директни разговори на високо ниво од почетокот на војната, но Украина и европските лидери не беа поканети.
Трамп подоцна дополнително ја засили својата реторика, обвинувајќи ја Украина за војната. Тој ја отфрли украинската загриженост дека тие биле исклучени од состанокот, додавајќи дека требало да започнат разговори многу порано.
„Денес слушнав „ох, не бевме поканети“. Па, три години сте тука, требаше да ја завршите… Никогаш не требаше да ја започнете. Требаше да склучите договор“, рече Трамп.
Зеленски одговори со тврдењето дека Русија лажела за време на состанокот и дека изјавата на Трамп е опасна. „Со сета почит кон претседателот Доналд Трамп како лидер, тој живее во простор на дезинформации“, рече Зеленски.
Рускиот претседател Владимир Путин, коментирајќи ги преговорите, рече дека Русија никогаш не ја исклучила можноста за преговори за Украина и дека не ги прекинала контактите ниту со Европејците, ниту со Киев.
Според него, европските и украинските власти биле тие кои ги прекинале или забраниле овие контакти. Путин истакна дека Украина нема да биде исклучена од преговарачкиот процес за ставање крај на војната.
Според него, американскиот претседател Доналд Трамп во телефонски разговор му рекол дека во преговорите ќе биде вклучен и Киев. „Се разбира, САД претпоставуваат дека преговарачкиот процес ќе се одвива со учество на Русија и Украина“, рече Путин и додаде: „Никој не ја исклучува Украина од овој процес“.
Иако и САД и Русија го оценија почетокот на преговорите како позитивен, Москва продолжува да нагласува дека не се откажува од главните цели на „специјалната воена операција“, а тоа се признавањето на четири украински региони како руски и ветувањето дека Украина нема да влезе во НАТО.
