Во разговор за Си-ен-ен по пристигнувањето во Вашингтон на разговори со американски претставници, Дмитриев рече дека средбата меѓу Доналд Трамп и Путин не е откажана, како што рече американскиот претседател, и дека двајцата лидери сепак веројатно ќе се сретнат.
Трамп рече дека ја откажал планираната средба со Путин во Будимпешта поради недостатокот на напредок во дипломатските напори за завршување на војната, како и поради чувството дека времето е несоодветно.
„Верувам дека Русија, САД и Украина се всушност доста блиску до дипломатско решение“, рече Дмитриев, но не објасни што би можело да значи тоа.
Европските земји соработуваат со Украина на нов предлог за прекин на огнот на сегашните борбени линии, изјавија европски дипломати за Ројтерс оваа недела. Се инсистираа САД да ја задржат централната улога во разговорите.
„Голем потег од страна на претседателот (на Украина Володимир) Зеленски е што веќе признава дека се работи за борбените линии. Знаете, неговиот претходен став беше дека Русија треба целосно да си замине – па затоа всушност мислам дека сме доста блиску до дипломатско решение“, додаде Дмитриев.
Русија ја започна својата инвазија на Украина во февруари 2022 година.
