Украина побара Израел да биде посредник, наведувајќи ги добрите односи на владата и со Киев и со Москва. Кабинетот на Бенет соопшти дека тој разговарал три пати во текот на викендот со украинскиот претседател Володимир Зеленски.
Во изјавите за неговиот кабинет Бенет не даде детали за неговата тричасовна средба во Кремљ со Путин во саботата, велејќи само дека за неа има „благослов и охрабрување од сите страни“ – алузија и на САД, меѓу другите сили.
„Ќе продолжиме да помагаме каде и да ни побараат, дури и ако шансите не се големи“, рече Бенет. „Во моментот кога ќе има макар и мала шанса, а имаме пристап до сите страни и можност, тоа го гледам како морална должност да го направиме секој обид.“
Двајцата водачи повторно разговараа по телефон во неделата, соопшти Кремљ, и разговараа за „најновите контакти на Бенет со лидерите на голем број земји“.
Паралелно, Бенет разговараше со лидерите на Германија и Франција додека неговиот министер за надворешни работи, Јаир Лапид, треба да се сретне со американскиот државен секретар Антони Блинкен денеска во Рига, според израелските власти.
Израел ја осуди руската инвазија на Украина, изрази солидарност со Киев и испрати хуманитарна помош. Но Бенет не ги исполни барањата на Украина за воена помош и ги држеше отворени каналите за Русија, со која Израел ги координира своите операции против иранските распоредувања во Сирија.
Околу 90 деца од еврејско сиропиталиште во украинскиот град Житомир во неделата беа пренесени од Романија во Тел Авив.
„Јас сум Нафтали, премиерот на Израел“, му рекол Бенет, кој се качил во авионот на Ел Ал по неговото слетување, на едно момче, бакнувајќи го во главата пред да го изведе од авионот.
На Твитер, Бенет рече дека групата, придружувана од членовите на Чабад-Лубавич, светско еврејско религиозно движење, повеќе од една недела бегала од битки и гранатирање.
Министерката за внатрешни работи Ајелет Шакед рече дека Израел, кој има 9,2 милиони жители, се подготвува за „многу, многу голем бран“ на имиграција предизвикан од конфликтот.
Во она што локалните медиуми го наведоа како обид да се спречат руските олигарси да избегаат во Израел за да ги избегнат санкциите, израелската аеродромска управа соопшти дека добила инструкции да не дозволува паркирање на приватни авиони повеќе од 24 часа.
