Министерот Танос Плеврис на грчката државна телевизија ЕРТ рече дека Грција соработува со други европски земји на создавање таканаречени центри за враќање, „по можност во Африка“.
Министрите од петте земји веќе се состанале за да разговараат за тоа прашање, а техничките тимови ќе се состанат следната недела.
„Повеќе не зборуваме теоретски, зборуваме практично“, рече Плеврис.
Тој не прецизира кои земји се разгледуваат како домаќини на центрите и додаде дека изборот на африканскиот континент „не е задолжителен“.
Наведе дека поголемите европски земји директно разговараат со државите во кои би можеле да се наоѓаат центрите за враќање.
Плеврис рече дека центрите се наменети за лица чии барања за азил се одбиени и чии земји на потекло одбиваат да ги примат назад.
Додаде дека нивното постоење би ги одвратило потенцијалните мигранти за кои е малку веројатно да добијат азил.
Министерот Плеврис рече дека целта е почетниот план да биде воспоставен во наредните неколку месеци.
Не е познато кога центрите за враќање би можеле да почнат со работа.
Сместена на југоисточната граница на Европа, Грција со децении им служи на луѓето што бегаат од конфликти и сиромаштија на Блискиот Исток, во Африка и Азија како една од главните влезни точки во Европската Унија.
Десетици илјади луѓе секоја година пристигнуваат во земјата, најчесто преку опасни морски патувања — од турското крајбрежје до блиските грчки острови во Егејско Море, или преку многу подолги премини низ Средоземно Море од северна Африка до јужните грчки острови Гавдос и Крит.
Атина зазема сè потврд став во постапувањето со миграцијата, а нејзината крајбрежна стража често е обвинувана дека спроведува таканаречено „оттурнување“ — итни протерувања на новодојдените без дозвола да поднесат барање за азил.
Грчката влада негира дека такви работи се случуваат.
Министерот за миграција Плеврис рече дека во 2025 година бројот на лицата што нелегално пристигнале во земјата е намален за 21 отсто во однос на 2024 година, односно имало 13.000 помалку пристигнувања лани во споредба со претходната година, како и намалување од 40 отсто во последните пет месеци.
Минатата недела европратениците гласаа за усвојување нова имиграциска политика што им овозможува на земјите од Европската Унија да одбијат азил и да депортираат мигранти ако потекнуваат од држава означена како безбедна.
Плеврис рече дека грчката влада сега се фокусира на враќањето на лицата чии барања за азил се одбиени.
Земјата веќе враќа околу 5.000 до 7.000 мигранти годишно, но со околу 40.000 до 50.000 нови пристигнувања секоја година, од кои приближно половината барања за азил се одбиваат, грчкиот министер рече дека сегашната стапка на враќање мора да биде поголема.
Плеврис во вчерашното телевизиско гостување рече дека следната недела ќе отпатува во Рим на состаноци со своите италијански и шпански колеги.
Наведе дека ќе се сретне и со „соодветниот министер“ од Пакистан, во рамките на разговорите со земјите на потекло за поголема соработка во врска со враќањето.
